ދިވެހިރާއްޖޭގެ އެކި ކަންކޮޅުތަކުގައި ދިމާވެފައިވާ ކުނީގެ މައްސަލައަށް ދާއިމީ ހައްލެއް ހޯދުމަށް ސަރުކާރުން ކުރަމުންދާ މަސައްކަތްތަކުގެ ދަށުން، ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާ ހަވާލުކޮށްފައިވާ ރަށްތަކުގެ ކުނިކޮށި ތަރައްޤީކުރުމުގެ ޢަމަލީ މަސައްކަތް ފެށުމަށް ތައްޔާރުވެފައިވާކަން އެ ކުންފުނިން ހާމަކޮށްފިއެވެ.
ވެމްކޯއާ ހަވާލުކޮށްފައިވަނީ ޖުމްލަ 34 ރަށެއްގެ ކުނިކޮށި ތަރައްޤީކުރުމުގެ މަސައްކަތެވެ. މި މަޝްރޫޢާ ގުޅޭގޮތުން މަޢުލޫމާތު ދެއްވަމުން ވެމްކޯގެ ޖެނެރަލް މެނޭޖަރ އިސްމާޢީލު އުބައިދު ވިދާޅުވީ، އެ ކުންފުންޏާ ހަވާލުކުރެވުނު ރަށްތަކުގެ ތެރެއިން 90 އިންސައްތަ ރަށެއްގައި މަސައްކަތް ފެށުމަށް ބޭނުންވާ ތަކެތި މިހާރު މޮބިލައިޒްކޮށް، މަސައްކަތް ފެށުމުގެ އެންމެ ފަހުގެ ތައްޔާރީތައް ވަމުންދާ ކަމަށެވެ.
ނަމަވެސް ބައެއް ރަށްރަށުގައި މަސައްކަތް ފެށުން ލަސްވަމުންދާކަން ފާހަގަކުރައްވައި އުބައިދު ވިދާޅުވީ، އެއީ އެ ރަށްރަށުގެ ލޭންޑް ޔޫސް ޕްލޭންގައި ކުނިކޮށި އެޅުމަށް ވަކި ބިމެއް ކަނޑައަޅާފައި ނެތުމުގެ ސަބަބުން ދިމާވާ ގޮންޖެހުމެއް ކަމަށެވެ. މި މައްސަލަ ހުރި ރަށްތައް ފިޔަވައި އެހެން ހުރިހާ ރަށެއްގައި މަސައްކަތްތައް ބާރުމިނުގައި ކުރިއަށްދާނެ ކަމުގެ ޔަގީންކަން އޭނާ ދެއްވިއެވެ.
ރާއްޖޭގައި ކުނި މެނޭޖުކުރުމުގެ ވަށާޖެހޭ ނިޒާމެއް ޤާއިމުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްކަންދޭ މުހިންމު ސިޔާސަތެކެވެ. މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ހާމަކޮށްފައިވާ ގޮތުގައި، އަންނަ އަހަރުގެ ޖުލައި މަހުގެ ނިޔަލަށް ރާއްޖޭގެ 129 ރަށެއްގައި ކުނި މެނޭޖުކުރާ މަރުކަޒުތައް ޤާއިމުކޮށް ނިންމުމަށް ވަނީ އަމާޒު ހިފާފައެވެ.
މި ބިޔަ މަޝްރޫޢުގެ ދަށުން ސަރުކާރުގެ އެކި ކުންފުނިތައް ކަމަށްވާ އެމްޓީސީސީ، ފެނަކަ، އާރްޑީސީ އަދި ވެމްކޯއާ 110 ރަށެއްގެ މަސައްކަތް ހަވާލުކޮށްފައިވާއިރު، އަމިއްލަ ކުންފުނިތަކާ 19 ރަށެއްގެ މަސައްކަތް ވަނީ ހަވާލުކޮށްފައެވެ.
މި މަޝްރޫޢުތައް ނިމުމުން، ރަށްރަށުގައި ކުނި މެނޭޖުކުރުމަށް ދިމާވެފައިވާ ދަތިތަކަށް ބޮޑު ލުޔެއް ލިބި، ތިމާވެށި ރައްކާތެރިކުރުމަށް ކުރެވޭ މަސައްކަތްތަކަށް އިތުރު ކުރިއެރުމެއް ލިބިގެންދާނެއެވެ.
