މެދުއިރުމަތީގައި ހިނގަމުންދާ ހަނގުރާމަ ކުއްލިއަކަށް އިތުރަށް ގޯސްވެދާނެކަމުގެ ބިރަށްޓަކައި، އެ ސަރަހައްދުގައި ތިބި އެމެރިކާގެ ރައްޔިތުން ވަގުތުން ފޭބުމަށް ވިސްނުމަށް އެމެރިކާގެ ޚާރިޖިއްޔާއިން އަންގައިފިއެވެ.
އައްމާން، ގުދުސް، މަސްޤަތު، ބަޣުދާދު އަދި ބެއިރޫތުގައި ހުންނަ އެމެރިކާގެ އެމްބަސީތަކުން ވަނީ އެއްގޮތް ސަލާމަތީ އިންޒާރުތަކެއް ނެރެ، ކުއްލިއަކަށް ވައިގެ ސަރަހައްދުތައް ބަންދުކޮށް ފްލައިޓްތައް ކެންސަލްވެދާނެ ކަމަށް ތައްޔާރުވެ ތިބުމަށް އަންގާފައެވެ.
އުރުދުންގައި ތިބި އެމެރިކާ މީހުންނަށް އަންގާފައިވަނީ އެމެރިކާގެ އަސްކަރީ މަރުކަޒުތަކާ ކައިރިނުވުމަށެވެ. އަދި އިޒްރޭލުގައި ތިބި މީހުންނަށް އަންގާފައިވަނީ ބޮމުން ރައްކާތެރިވާނެ ތަންތަން ހޯދައިގެން ތިބުމަށެވެ. މި އިންޒާރުތައް ނެރެފައިވަނީ، ހޮރްމުޒް ކަނޑުއޮޅި ހުޅުވުމަށްޓަކައި އިޒްރޭލާ ގުޅިގެން އީރާނަށް ވަރުގަދަ ޙަމަލާތަކެއް ދޭން ރާވަމުންދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފައިވާ ދަނޑިވަޅެއްގައެވެ.
