އެމެރިކާގެ ރައީސް ޑޮނަލްޑް ޓްރަމްޕް، އީރާނާ ދެކޮޅަށް ދޭން ރާވާފައި ފައިވާ ހަމަލާތައް ކެންސަލް ކޮށްފިކަން އިޢުލާނު ކޮށްފިއެވެ. ޓްރަމްޕް ވަނީ މި ހަމަލާތައް މަޑުޖައްސާލީ ވަރަށް އަވަހަށް އެއްބަސްވުމަކަށް އާދެވޭނެ ކަމުގެ އުންމީދު އޮތުމުން ކަމަށް ބުނެފައެވެ.
ވައިޓް ހައުސްއިން ހާމަކުރި ގޮތުގައި، އީރާނާއި މެދުއިރުމަތީގެ އެހެން ބައެއް ގައުމުތަކުން ވަނީ ހަމަލާ ނުދިނުމަށް ޓްރަމްޕްގެ އަރިހުން އެދިފައެވެ. ޓްރަމްޕް އިތުރަށް ބުނިގޮތުގައި މިހާރު ވަނީ އެއްބަސްވުމެއްގެ އަސާސީ އޮނިގަނޑާ މެދު މަޝްވަރާ ކުރެވިފައެވެ. މީގެ ތެރޭގައި ދުނިޔޭގެ ތެޔޮ ސަޕްލައިގައި މުހިންމު ދައުރެއް އަދާކުރާ ”ސްޓްރެއިޓް އޮފް ހޯރްމުޒް“ އަލުން ހުޅުވާލުން ހިމެނެއެވެ.
ނަމަވެސް، އީރާނުގެ ފޮރިން މިނިސްޓަރު އައްބާސް އަރަގްޗީ ވަނީ އެމެރިކާ އާއި އިސްރާއީލުން އީރާނަށް ދޭ ކޮންމެ ހަމަލާއަކަށް ވަރުގަދަ ރައްދު ހަމަލާއެއް ދޭނެ ކަމުގެ އިންޒާރު ދެއްވާފައެވެ. އޭނާ މިހެން ވިދާޅުވީ ޕާކިސްތާނުގެ އަސްކަރީ ވެރިޔާއާއި، ތުރުކީ އަދި ސައުދީ އަރަބިއްޔާގެ ފޮރިން މިނިސްޓަރުންނާ ފޯނުން ގުޅުއްވައި ދެއްކެވި ވާހަކަފުޅުގައެވެ.
މި ނުތަނަވަސްކަމުގެ ތެރޭގައި، އިސްރާއީލު ސިފައިން ފަލަސްތީނުގެ ގައްޒާއަށް ދެމުންދާ ހަމަލާތައް ވަނީ އިތުރަށް ވަރުގަދަކޮށްފައެވެ. އެގޮތުން ގައްޒާގެ އެކި ސަރަހައްދުތަކުން އަށް މީހަކު ޝަހީދުކޮށްލާފައިވާއިރު، ދީރް އަލް-ބަލާހްގައި ހުރި ބޭސް ގުދަނަކަށް ދިން ހަމަލާއެއްގައި އެ ތަން ވަނީ އެއްކޮށް ސުންނާފަތިވެފައެވެ.
އިސްރާއީލުން ދިން މި ހަމަލާގެ ސަބަބުން އެ ސަރަހައްދުގައި 20 މީޓަރު (66 ފޫޓު) ފުޅާ އަދި 10 މީޓަރު (33 ފޫޓު) ފުން ބޮޑު ވަޅުގަނޑެއް ވަނީ އުފެދިފައެވެ. މި ހަމަލާއަކީ ފަލަސްތީނުގެ އާންމުންނަށް ބޭނުންވާ ސިއްހީ އެހީތެރިކަން ފޯރުކޮށްދިނުމަށް ހުރަސްއެޅުމުގެ ގޮތުން އިސްރާއީލުން ހިންގި ލާއިންސާނީ އަމަލެއްގެ ގޮތުގައި ފާހަގަކުރެވެއެވެ. ގައްޒާގެ އެކި ސަރަހައްދުތަކަށް ދެމުންދާ މިފަދަ ހަމަލާތަކުގައި ފަލަސްތީނުގެ ގިނަ އަދަދެއްގެ ރައްޔިތުން ދަނީ ޝަހީދުވަމުންނެވެ.
