މުލީގައި ކުރިއަށްދިޔަ ”މުލީކޮޅު ރާޅުގަނޑު 2026“ ސާފިން މުބާރާތުގެ ޖޫނިއާ ކެޓަގަރީގެ ފޯރިގަދަ ފައިނަލުގައި މުހައްމަދު އިނާން އަބްދުލް ހަންނާން ބަލިކޮށް، ކަޔާން އަބްދުﷲ އަރީފް ޗެމްޕިއަންކަން ކާމިޔާބުކޮށްފިއެވެ.
މިދިޔަ ހޮނިހިރު ދުވަހު ބޭއްވުނު ޖޫނިއާ ޑިވިޝަނުގެ ފައިނަލް ހީޓުގައި ކަޔާން ކުރިހޯދީ 1.84 ގެ ތަފާތަކުންނެވެ. މި ހީޓުގައި ކަޔާންއަށް ޖުމްލަ 12.34 ގެ ސްކޯއެއް ލިބުނުއިރު، އިނާންއަށް ލިބިފައިވަނީ 10.50 ގެ ސްކޯއެކެވެ.
ފައިނަލް ހީޓުގައި ކަޔާން ޖުމްލަ ހަތް ރާޅެއްގައި އަޅާފައިވެއެވެ. އޭނާ އެންމެ މަތިން ސްކޯކުރީ ފުރަތަމަ ރާޅާއި ހަތްވަނަ ރާޅުގައެވެ. އެގޮތުން ފުރަތަމަ ރާޅުން 7.17 ގެ ސްކޯއެއް ހޯދިއިރު، ހަތްވަނަ ރާޅުން ވަނީ 5.10 ސްކޯކޮށްފައެވެ.
އިނާން މި ހީޓުގައި ޖުމްލަ 12 ރާޅެއްގައި އަޅާފައިވާއިރު، އޭނާއަށް އެންމެ ރަނގަޅު ސްކޯއެއް ލިބުނީ ދެވަނަ ރާޅުންނާއި 12 ވަނަ ރާޅުންނެވެ. އެއީ ދެވަނަ ރާޅުން ލިބުނު 5.33 އާއި 12 ވަނަ ރާޅުން ލިބުނު 5.17 އެވެ.
މި މުބާރާތުގެ ފައިނަލަށް ކަޔާން ދަތުރުކުރީ ސެމީ ފައިނަލުގައި ހުސެއިން އަޒާން އިސްމާއިލްގެ މައްޗަށް ކުރިހޯދައިގެންނެވެ. އަދި އިނާން ފައިނަލުން ޖާގަ ހޯދީ ސެމީގައި އަހުމަދު ރަފްއާން ރައުފް ބަލިކުރުމަށްފަހުއެވެ.
މުލީކޮޅު ރާޅުގަނޑަކީ ރާއްޖޭގެ ރާޅާ އެޅުންތެރިންގެ މެދުގައި ވަރަށް ބޮޑު މަގުބޫލުކަމެއް ލިބެމުންދާ މުބާރާތެކެވެ. މި އަހަރުގެ މުބާރާތުގައި ވެސް ޒުވާން ގިނަ ހުނަރުވެރިންތަކެއް ފެނިގެން ގޮސްފައިވާކަން ފާހަގަކުރެވެއެވެ.
