މާލޭގެ މައި މަގު، މަޖީދީމަގުގައި ހުރި ނަރުދަމާ ޖަންކްޝަނެއް ފުރިގެން ނަޖިސް ބޭރުވާން ފެށުމާއެކު، އެ ސަރަހައްދު ބޭނުންކުރާ އާންމުން ބަލިމަޑުކަމެއްގެ ބިރުވެރިކަމެއްގެ ތެރެއަށް ހުށަހެޅިއްޖެއެވެ.
މި މައްސަލަ ކުރިމަތިވެފައިވަނީ މަޖީދީމަގުގެ ލެކިއުޓް އަދި ޑިލައިޓް ފިހާރަ ހުންނަ ސަރަހައްދުގައެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ޖަންކްޝަނުން ފައިބަމުންދާ ނަޖިސްތައް ވަނީ ވިއްސާރައިގެ ސަބަބުން މަގުމަތީގައި ހެދިފައިވާ ފެންގަނޑުތަކާ އެކުވެފައެވެ. މީގެ ސަބަބުން މުޅި ސަރަހައްދުގައި ވަނީ ނުބައި ވަސް ހިފާ، ހިނގާބިނގާވެ އުޅުމަށް ބޮޑެތި ދަތިތަކެއް ކުރިމަތިވެފައެވެ.
އެ ސަރަހައްދުން ދަތުރުކުރި މީހަކު ކަންބޮޑުވުން ފާޅުކުރަމުން ބުނީ، މަގުމަތީގައި ދުއްވާ އުޅަނދުފަހަރުން ބުރާ ނަޖިސް ފެންގަނޑުގެ އަސަރު މަގުން ހިނގާފައިދާ މީހުންގެ ގަޔަށް ބުރަމުންދާ ކަމަށެވެ.
”މިއީ އިންތިހާއަށް ދަށު ދަރަޖައިގެ ކަމެއް. ކުޑަކުދިންނާއި އާންމުން ހިނގާބިނގާވެ އުޅޭ މިފަދަ ބޮޑު މަގަކުން މިގޮތަށް ނަޖިސް ބޭރުވާއިރު، މިއީ ބަލިމަޑުކަމެއް ފެތުރިދާނެ ސީދާ ސަބަބެއް، މާލޭގެ މޭޔަރުގެ ޒިންމާއެއް ނެތް“ މިކަން ތަޖުރިބާކުރި އާންމުރައްޔިތަކު ބުންޏެވެ.
މި ހާދިސާއާ ގުޅިގެން މާލެ ސިޓީ ކައުންސިލުން މިހާތަނަށް އެއްވެސް ފިޔަވަޅެއް އަޅާފައި ނުވާތީ އާއި، ރަސްމީކޮށް އެއްވެސް ބަހެއް ބުނެފައި ނުވާތީ އާންމުންގެ ނުރުހުން ވަނީ އަމާޒުވެފައެވެ. މާލޭގެ މަގުތަކުގެ ސާފުތާހިރުކަމާއި ޖަންކްޝަންތައް ބެލެހެއްޓުމަކީ ކައުންސިލްގެ ޒިންމާއަކަށް ވާއިރު، މިފަދަ ނުރައްކާތެރި މައްސަލައެއްގައި ކައުންސިލްގެ ”ހިމޭންކަމާ“ މެދު ގިނަ ބަޔަކު ސުވާލު އުފައްދައެވެ.
މަޖީދީމަގަކީ ކޮންމެ ދުވަހަކު އެތައް ހާސް ބަޔަކު ބޭނުންކުރާ މަގަކަށް ވާއިރު، މިފަދަ ސިއްހީ ނުރައްކަލެއް ކުރިމަތިވެފައި އޮތުމަކީ ރައްޔިތުންގެ ސަލާމަތަށް އޮތް ބޮޑު ބިރެކެވެ. އާންމުން ގޮވާލަމުންދަނީ ކަމާބެހޭ ފަރާތްތަކުން ވަގުތުން ވަގުތަށް މި މައްސަލަ ހައްލުކޮށް، މަގުމަތީގެ ރައްކާތެރިކަން ކަށަވަރުކޮށްދިނުމަށެވެ.
