އިންޑިއާގެ ބޮޑުވަޒީރު ނަރެންދުރަ މޯދީއަށް ”އިހާނެތިކޮށް“ ހިތާފައިވާ ކަމަށް ބުނެ، އެގައުމުގައި ދާދިފަހުން ކުރިއަށްދިޔަ މުޒާހަރާތަކުގެ ބައިވެރިންނާ ދެކޮޅަށް އެގައުމުގެ ފުލުހުން ވަރުގަދަ ފިޔަވަޅުތަކެއް އަޅަން ފަށައިފިއެވެ.
މިދިޔަ ޖުލައި މަހުގެ 25 ވަނަ ދުވަހު ނިމުމަކަށް އައި ”ކޮކްރޯޗް ޖަންތާ ޕާޓީ“ އިސްވެ އޮވެ ކުރިއަށްގެންދިޔަ މުޒާހަރާތަކާ ގުޅިގެން، ގިނަ ބައެއްގެ މައްޗަށް ފުލުހުން ވަނީ މައްސަލަތައް ރަޖިސްޓްރީކޮށް ދަޢުވާ އުފުލަން ނިންމާފައެވެ. މީގެ އިތުރުން ސޯޝަލް މީޑިއާގައި ބޮޑުވަޒީރު މޯދީއަށް ފާޑުކީ މީހުންގެ އެކައުންޓްތައް ހުއްޓުވުމާއި، އޮންލައިންކޮށް އެފަދަ ފަރާތްތަކަށް ފުރައްސާރަކުރުން އިތުރުވެފައިވާ ކަމަށް މަސްދަރުތަކުން ރިޕޯޓްކުރެއެވެ.
މި މައްސަލައާ ގުޅިގެން ބޮޑުވަޒީރު ނަރެންދުރަ މޯދީ ބުނީ މުޒާހަރާތަކުގެ ތެރޭގައި މޯދީއަށް ބަހުގެ ހަމަލާތައް ދީފައިވަނީ ”މަގުއޮޅިފައިވާ ކުދިންތަކެއް“ ކަމަށެވެ. އަދި އެފަދަ ހުރިހާ ކުދިންނަށް މާފުކޮށްފައިވާ ކަމަށްވެސް މޯދީ ބުނެފައިވާ ކަމަށް މީޑިއާތަކުން ރިޕޯޓުކުރެއެވެ.
ނަމަވެސް، އިންޑިއާ ސަރުކާރުގެ މި ފިޔަވަޅުތަކާ ގުޅިގެން އިންސާނީ ހައްގުތަކަށް މަސައްކަތްކުރާ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ. އެފަރާތްތަކުން ބުނާ ގޮތުގައި މިއީ ހިޔާލުފާޅުކުރުމުގެ މިނިވަންކަމަށް ހުރަސް އެޅުމަށް މޯދީގެ ހައްދަުފަހަނާއެޅި ބީޖޭޕީ ސަރުކާރުން ހިންގާ އަމަލެކެވެ.
މި މުޒާހަރާތަކަކީ އިންޑިއާގެ ސަރުކާރުގެ ހުދުމުހުތާރު ސިޔާސަތުތަކާ ދެކޮޅަށް އެ ޤައުމުގެ ރައްޔިތުންގެ މެދުގައި އުފެދިފައިވާ ނުރުހުން ފާޅުކުރުމުގެ ގޮތުން ބޭއްވުނު ހަރަކާތްތަކެކެވެ. އެހެންނަމަވެސް، ބީޖޭޕީ ސަރުކާރުން ދެކޭ ގޮތުގައި މިއީ ގައުމުގެ ހަމަޖެހުން ނަގާލުމަށް ބަޔަކު ގަސްތުގައި ހިންގި އަމަލުތަކެކެވެ.
