ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އަންހެނުންގެ ހަރަކާތުގެ ރައީސްކަމުގެ މަގާމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު، ވާދަކުރައްވާނެކަން އިއުލާނުކޮށްފިއެވެ.
މި އަހަރު ބާއްވަން ތައްޔާރުވަމުން އަންނަ ޕީއެންސީގެ ކޮންގްރެސްގައި ޕާޓީގެ އިސް މަގާމުތަކަށް ބޭފުޅުން އިންތިހާބު ކުރާނެ އެވެ. ޕާޓީގެ ރައީސާއި ނައިބު ރައީސް އިންތިހާބު ކުރާނީ ޕީއެންސީގެ މަތީ މަޖިލީހުންނެވެ.
ހީނާގެ ނިންމެވުމާއެކު، އެ ޕާޓީގެ އެތެރޭގެ އިންތިހާބުގެ ފޯރި އިތުރަށް ގަދަވެފައިވާއިރު، އަންހެނުންގެ ހަރަކާތް ވަރުގަދަ ކުރުމަށް އޭނާ ގިނަ މަސައްކަތްތަކެއް ކުރައްވާނެ ކަމަށް ވަނީ ވިދާޅުވެފައެވެ.
ޕީއެންސީގެ އަންހެނުންގެ ހަރަކާތުގެ ރައީސްކަމަށް ކުރިމަތިލައްވާކަން ހާމަކުރައްވަމުން ހީނާ ވަނީ ޕާޓީގެ މެންބަރުންގެ ފުރިހަމަ ތާއީދަށް އެދިވަޑައިގެންފައެވެ.
ސަރުކާރުގެ އިސް މަގާމެއްގައި ހުންނަވައިގެން ގައުމީ ހިދުމަތުގައި ދެމިހުންނެވި ހީނާ، މި މަގާމަށް ކުރިމަތިލެއްވުމަކީ ޕާޓީގެ ސިޔާސީ ހަރަކާތްތަކުގައި އަންހެނުންގެ ދައުރު ފުޅާކުރުމަށް އެޅުއްވި މުހިންމު ފިޔަވަޅެއް ކަމަށް ސިޔާސީ މަސްރަހު ދިރާސާކުރާ ފަރާތްތަކުން ދެކެއެވެ.
ހީނާ ވަލީދަކީ މީގެ ކުރިން ވެސް ސިޔާސީ ދާއިރާގައި ހަރަކާތްތެރިވެވަޑައިގެންފައިވާ އަދި މިހާރުގެ ސަރުކާރުގެ ވަޒީރުކަމުގެ މަގާމުގައި ހުންނަވައިގެން ގިނަގުނަ މަސައްކަތްތަކެއް ކުރައްވަމުން ގެންދަވާ ބޭފުޅެކެވެ.
ޕީއެންސީން ކޮންގްރެސް ބާއްވާނެ ތާރީހެއް އަދި އިއުލާނެއް ނުކުރެއެވެ. ނަމަވެސް އެ ޕާޓީން މި ފަހުން ވަނީ ސްޓިއަރިން ކޮމިޓީތަކާއި ދާއިރާތަކުގެ އިންތިހާބު މި ފަހުން ބާއްވައިފަ އެވެ
