މާލެ ސަރަހައްދަށް ދިމާވެފައިވާ ޓްރެފިކް އަދި ޕާކިންގެ މައްސަލަތަކަށް ދާއިމީ ހައްލެއް ހޯއްދަވައިދެއްވުމަށް ސަރުކާރުން ކުރިއަށްގެންދާ މަޝްރޫއުގެ ދަށުން، ޕާކިން ބިލްޑިންގްތައް އެޅުމުގެ އަމަލީ މަސައްކަތް ވަރަށް އަވަހަށް ފެށޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ޕީއެސްއެމް ނިއުސްއިން ގެނެސްދޭ ”ނޭޝަން ޗެޓް“ ޕޮޑްކާސްޓްގެ ތިންވަނަ އެޕިސޯޑުގައި ވާހަކަފުޅު ދައްކަވަމުންނެވެ. ރައީސް ވިދާޅުވި ގޮތުގައި މާލެ ސަރަހައްދުގެ ތޮއްޖެހުން ކުޑަކުރުމަށްޓަކައި ޖުމްލަ 7 ޕާކިން ބިލްޑިންގް ތަރައްގީކުރުމަށް ވަނީ ނިންމާފައެވެ. މީގެ ތެރޭގައި މާލޭގެ އިތުރުން ހުޅުމާލެ އަދި ވިލިމާލެ ވެސް ހިމެނެއެވެ.
މި މަޝްރޫއާ ގުޅޭ ތަފްސީލު ދެއްވަމުން ރައީސް ވިދާޅުވީ، ޕާކިން އިމާރާތްތައް އެޅުމަށް ބޭނުންވާ ބިންތައް މިހާރު ޓްރާންސްޕޯޓް މިނިސްޓްރީއާ ގުޅިގެން ހަމަޖައްސާފައިވާ ކަމަށެވެ. އަދި އެންމެ ފުރަތަމަ މާލޭގައި ދެ އިމާރާތެއް އެޅުމުގެ މަސައްކަތް ފެށިގެންދާނެ ކަމަށް އެމަނިކުފާނު ފާހަގަކުރެއްވިއެވެ. މި އިމާރާތްތައް ނިމުމުން ހަތަރު ފުރޮޅުލީ އުޅަނދުތަކަށް 2600 އަށްވުރެ ގިނަ ޖާގަ އަދި ދެ ފުރޮޅުލީ އުޅަނދުތަކަށް 1000 ޖާގަ ލިބިގެންދާނެއެވެ.
”މަގުތަކުގައި ޕާކު ކުރާ ގޮތާއި ގުޅޭގޮތުން އަމަލީ ގޮތުން ތަންފީޒުކުރާނީ މި އޮފީހުގެ ދަށުން. ޕާކު ކުރާ ގޮތް ޕިޒިކަލީ ގެންނަ ބަދަލުތަކާއި ޕާކިން ބިލްޑިން އެޅުންވެސް މިހާރު ވަނީ ޓްރާންސްޕޯޓް މިނިސްޓްރީއާއި މާލޭގެ ބައެއް ބިންތައް ހަމަޖައްސާފައި . އެތަންތަނުގައި އިމާރާތްތައް އަޅަން ސަރުކާރުން ވަރަށް އަވަހަށް ފަށާނެ. މާލޭގައި ދެ އިމާރާތެއް އަޅާނެ.“ ރައީސް ވިދާޅުވިއެވެ.
މަގުތަކުގައި ޕާކުކުރާ ގޮތަށް ގެނެވޭ ބަދަލުތަކާއި، މިފަދަ މަޝްރޫއުތައް ތަންފީޒުކުރުމަށްޓަކައި އަލަށް އުފެއްދެވި ”ގްރޭޓަރ މާލެ ޓްރާންސްޕޯޓް އެންޑް މޮބިލިޓީ އޮފީސް“ އާ ގުޅޭގޮތުން އިދިކޮޅު ފަރާތްތަކުން ދައްކާ ވާހަކަތަކަށް ވެސް ރައީސް ވަނީ ރައްދު ދެއްވާފައެވެ. ރައީސް ވިދާޅުވީ އެ އޮފީހަކީ ދައުލަތުގެ ހަރަދު ބޮޑުކުރުމަށް އުފެއްދި ތަނެއް ނޫން ކަމަށާއި، އެތަނުގައި މަސައްކަތް ކުރާނީ މިހާރުވެސް އެކި މުއައްސަސާތަކުގައި ތިއްބެވި ތަޖުރިބާކާރު މުވައްޒަފުން ކަމަށެވެ. އަދި އެ އޮފީހަށް ގާނޫނީ ބާރުވެރިކަން ދިނުމުގެ މަސައްކަތް މިހާރު ކުރިއަށްދާ ކަމަށްވެސް ވިދާޅުވިއެވެ.
މާލޭގެ ޓްރެފިކް މައްސަލަ ހައްލުކުރުމުގައި ރައްޔިތުންގެ އެއްބާރުލުން މުހިންމުކަން ފާހަގަކުރައްވަމުން ރައީސް ވިދާޅުވީ، ސަރުކާރުގެ އަމާޒަކީ މި މަޝްރޫއުތަކުގެ ޒަރީއާއިން މާލެ ސަރަހައްދުގެ ދަތުރުފަތުރާއި ޕާކިންގެ މައްސަލައަށް ދާއިމީ އަދި ލުއި ފަސޭހަ ހައްލެއް ހޯދައިދިނުން ކަމަށެވެ.
