އީރާނުގެ އިންޤިލާބީ ފައުޖު (އައި.އާރު.ޖީ.ސީ) ގެ ކަނޑުގެ އަސްކަރިއްޔާއިން ބުނެފައިވަނީ، އެމެރިކާގެ އަސްކަރީ ވައިގެ ހިމާޔަތާއެކު ހޮރްމޫޒް ކަނޑުއޮޅިން ދަތުރުކުރަން އުޅުނު ދެ ތެޔޮ އުޅަނދަކަށް އަމާޒުކޮށް ކާމިޔާބު ހަމަލާތަކެއް ދީފައިވާނެ ކަމަށެވެ.
އީރާނުން ކަނޑައަޅާފައިވާ ޚާއްޞަ މަގު ނޫން އެހެން މަގެއްގައި އެމެރިކާގެ އަސްކަރީ އެހީތެރިކަމާއެކު ދަތުރުކުރަން އުޅުނު އުޅަނދުތަކަށް އިންޒާރުދިނުމަށްފަހު ހަމަލާދީ ހުއްޓުވާފައިވާނެ ކަމަށް އީރާނުން މައުލޫމާތު ދެއެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ވަނީ އީރާނުން ކަނޑުއޮޅި ބަންދުކޮށްފައިވާ ކަމަށް ބުނާ ބުނުން ދޮގުކޮށްފައެވެ. އަދި ބައިނަލްއަޤްވާމީ ވިޔަފާރި އުޅަނދުފަހަރަށް ރައްކާތެރިކަން ދީގެން އެ ސަރަޙައްދުން ދަތުރުކުރުމުގެ އިންތިޒާމު ހަމަޖައްސަމުންދާ ކަމަށް ސެންޓްކޮމް އިން ބުނެފައިވެއެވެ.
