މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ތެރެއިން 2 ލައްކައަށްވުރެ ގިނަ ފަތުރުވެރިން ގެސްޓްހައުސްތަކުގައި ޗުއްޓީ ހޭދަކޮށްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން އާންމުކޮށްފައިވާ ހިސާބުތަކަށް ބަލާއިރު، އަހަރުގެ މިހާތަނަށް ރާއްޖެއަށް ޖުމްލަ 1،241،422 ފަތުރުވެރިން ވަނީ ޒިޔާރަތްކޮށްފައެވެ. މީގެތެރެއިން 274،687 ފަތުރުވެރިން ޗުއްޓީ ހޭދަކޮށްފައިވަނީ ގެސްޓްހައުސްތަކުގައެވެ. މިއީ ރާއްޖެއަށް ޒިޔާރަތްކުރި ފަތުރުވެރިންގެ ޖުމްލަ އަދަދުގެ 22.6 ޕަސަންޓެވެ.
ގެސްޓްހައުސްތަކުގައި އެންމެ ގިނައިން ޗުއްޓީ ހޭދަކޮށްފައިވަނީ ޗައިނާ އަދި އިޓަލީވިލާތުގެ ފަތުރުވެރިންނެވެ. އެގޮތުން، މި މުއްދަތުގެ ތެރޭގައި ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ޤައުމުކަމަށްވާ ޗައިނާއިން 213،317 ފަތުރުވެރިން ރާއްޖެއަށް އައިސްފައިވާއިރު، އޭގެތެރެއިން 28.6 ޕަސަންޓު ފަތުރުވެރިން ޗުއްޓީ ހޭދަކޮށްފައިވަނީ ގެސްޓްހައުސްތަކުގައެވެ.
ދެވަނައަށް އެންމެ ގިނައިން ގެސްޓްހައުސްތަކުގައި ޗުއްޓީ ހޭދަކޮށްފައިވަނީ އިޓަލީވިލާތުގެ ފަތުރުވެރިންނެވެ. އެ ޤައުމުން 96،876 ފަތުރުވެރިން ޒިޔާރަތްކުރިއިރު، އޭގެތެރެއިން 28.2 ޕަސަންޓު ފަތުރުވެރިން ޚިޔާރުކޮށްފައިވަނީ ގެސްޓްހައުސްތަކެވެ.
ރާއްޖޭގައި މިވަގުތު 944 ގެސްޓްހައުސްއެއް ހިންގަމުންދާއިރު، މިތަންތަނުގެ ބެޑް ކެޕޭސިޓީ 17،010 އަށް އަރައެވެ. މިއީ ރާއްޖޭގެ ޖުމްލަ ބެޑް ކެޕޭސިޓީގެ 25 ޕަސަންޓެވެ. ގެސްޓްހައުސްތަކުގެ ބެޑް ކެޕޭސިޓީއަށް ބަލާއިރު އެންމެ ގިނަ އެނދު ނެރެފައިވަނީ ކ. އަތޮޅުންނެވެ. އެ އަތޮޅުން 8،162 އެނދު އޮޕަރޭޝަނަށް ނެރެފައިވާއިރު، އއ. އަތޮޅުން 2،312 އެނދު ގެސްޓްހައުސްތަކުގައި ވަނީ އޮޕަރޭޝަނަށް ގެނެސްފައެވެ.
