މިއަދު ހެނދުނު ކުރި ގަދަ ވިއްސާރައާއި ވައިގަދަވުމުގެ ސަބަބުން، ކ. މާފުށީ ބޭރުގައި އަޅާފައި އޮތް ސަފާރީއެއްގެ ނަގިލި ކަނޑައިގެން ގޮސް، އެ ރަށު ބަނދަރުގެ ތޮށިމައްޗަށް އުރި އެއްކޮށް ސުންނާފަތިވެއްޖެއެވެ.
މި ހާދިސާ ހިނގަން މެދުވެރިވީ މިދުވަސްވަރު ރާއްޖެއަށް ކުރަމުންދާ ހުޅަނގު މޫސުމުގެ ވިއްސާރައިގައި ވައި ބާރުވުމުގެ ސަބަބުންނެވެ. މާފުށިން މައުލޫމާތު ދިން ގޮތުގައި، ސަފާރީގެ ނަގިލި ކަނޑައިގެން ދިޔަަތާ މާ ގިނައިރުތަކެއް ނުވަނީސް އޮޔާ ގޮސް ސަފާރީ ވަނީ ރަށުގެ ބަނދަރު ތޮށިމައްޗަށް އުރިފައެވެ. އަދި ތޮއްޓަށް އުރުނުތާ ގާތްގަނޑަކަށް 30 މިނެޓުގެ ތެރޭގައި، ރާޅުތަކުގެ ސަބަބުން ސަފާރީ ވަނީ އެއްކޮށް ފުނޑުފުނޑުވެފައެވެ.
ހާދިސާ ހިނގި ވަގުތު އެ ސަފާރީގައި ފަސް މީހުން ތިއްބެވެ. އޭގެ ތެރޭގައި ހިމެނެނީ ލަންކާއާއި ބަންގްލަދޭޝަށް ނިސްބަތްވާ ބިދޭސީންނެވެ. ސަފާރީ ތޮއްޓަށް އުރުމާއެކު އޭގައި ތިބި ހުރިހާ މީހުން ވަނީ ކަނޑަށް ފުންމާލައި، ފަތާފައި ރަށަށް އަރާފައެވެ. މި ހާދިސާގައި އެއްވެސް މީހަކަށް ސީރިއަސް އަނިޔާއެއް ލިބުނު ކަމުގެ ރިޕޯޓެއް ލިބިފައެއް ނުވެއެވެ.
މި ހާދިސާއާ ގުޅޭގޮތުން ފުލުހުންގެ ރަސްމީ ބަހެއް މިހާތަނަށް ލިބިފައި ނުވާއިރު، މޫސުން ގޯސްވުމުގެ ސަބަބުން ކަނޑުދަތުރުފަތުރު ކުރުމުގައާއި އުޅަނދުފަހަރު ބަނދަރުކުރުމުގައި ސަމާލުވުމަށް މޫސުމާ ބެހޭ ގައުމީ އިދާރާއިން ވަނީ އިލްތިމާސްކޮށްފައެވެ.
