މިޞްރުގެ މެޑިޓަރޭނިއަން ކަނޑުގެ ބަނދަރެއް ކަމަށްވާ ދަމިއެޓާ ބަނދަރުގައި އޮތް ދެ ގޭސް އުޅަނދެއްގައި ރޯވި އަލިފާނަކީ ޑްރޯން ހަމަލާއެއްގެ ސަބަބުން ހިނގި ހާދިސާއެއްކަން މިޞްރު ސަރުކާރުން ކަށަވަރުކޮށްދީފިއެވެ.
މި ހަމަލާ އަމާޒުވެފައިވަނީ އެމެރިކާގެ ކުންފުންޏަކުން ހިންގާ ”އެނާގޮސް ވިންޓަރ“ ނަމަކަށް ކިޔާ އެލްއެންޖީ ގޭސް ރައްކާކުރާ އުޅަނދަކަށެވެ. މި ޙަމަލާގެ ސަބަބުން ރޯވި އަލިފާންގަނޑު ކައިރީގައި އޮތް ”ގޭސްލޮގް ސޭލަމް“ އުޅަނދަށްވެސް ވަނީ ފެތުރިގެން ގޮސްފައެވެ.
މި ހާދިސާގައި އެއްވެސް މީހަކަށް އަނިޔާއެއް ނުވަތަ މަރުވެފައެއް ނުވެއެވެ. އަދި އަލިފާންގަނޑު ވަނީ ކޮންޓްރޯލްކޮށްފައެވެ. މިޞްރުގެ ކެބިނެޓުން ބުނެފައިވަނީ ޤައުމީ ސަލާމަތާއި މަޞްލަޙަތު ދިފާޢުކުރުމަށް އަޅަންޖެހޭ އެންމެހައި ފިޔަވަޅުތައް އަޅަމުންދާ ކަމަށެވެ.
މިއީ މިހާރު ކުރިއަށްދާ މެދުއުރުމަތީގެ ހަނގުރާމައިގެ ތެރޭގައި މިޞްރުގެ ހަކަތައިގެ ވަސީލަތަކަށް ދެވުނު ފުރަތަމަ ސީދާ ހަމަލާއެވެ.
