މާލެ ސިޓީގައި ބޭއްވުމަށް ހަމަޖެހިފައި އޮތް “ބިޔޯން އަގެއިން“ ޝޯ ސަރުކާރުން ކުއްލިއަކަށް ކެންސަލް ކުރުމާ ގުޅިގެން މާލޭގެ މޭޔަރު އާދަމް އާޒިމް ދެއްކެވި ވާހަކަތަކަކީ މިހާރު އާންމު ފާޑުކިއުންތަކެއް އަމާޒުވެފައިވާ މައްސަލައެކެވެ. އާޒިމްގެ ވާހަކަތަކުގައި މި ޝޯ ހުއްޓުވުމަކީ ޤައުމުގެ އިޤްތިޞާދަށާއި ވިޔަފާރިތަކަށް ލިބުނު ބޮޑު ގެއްލުމެއް ކަމަށް ސިފަކުރައްވައި، ސަރުކާރުގެ ނިންމުމަށް ވަރަށް ބޮޑަށް ފާޑުވިދާޅުވެފައިވެއެވެ.
އާދަމް އާޒިމްގެ އެކްސްގައި ވިދާޅުވެފައިވަނީ، ބޭރު ދުނިޔެއަށް ރާއްޖެ އިޝްތިހާރު ކުރުމަށް މަސައްކަތްކުރަމުންދާ ދަނޑިވަޅެއްގައި، އެފަދަ ޝޯއެއް ކުއްލިއަކަށް ކެންސަލް ކުރުމަކީ ޒިންމާދާރުކަން ކުޑަ އަމަލެއް ކަމަށެވެ. އަދި މީގެ ސަބަބުން އިޤްތިޞާދީ ގޮތުންނާއި އިޖުތިމާޢީ ގޮތުން ލިބެން ހުރި ފައިދާތައް ގެއްލިގެން ދިޔަ ކަމަށް އޭނާ ފާހަގަކުރައްވާފައިވެއެވެ. ނަމަވެސް، މި ވާހަކަތަކާ ގުޅިގެން ސޯޝަލް މީޑިއާގައާއި އާންމު މަޝްވަރާތަކުގައި މި ޝޯގެ ހަޤީޤީ މަޤްސަދާ މެދު ބޮޑެތި ސުވާލުތަކެއް ވަނީ އުފެދިފައެވެ.
މި ޝޯއަކީ ރާއްޖޭގެ ޤާނޫނުތަކާއި އިސްލާމީ އަގީދާއާ ފުށުއަރާ ކަންތައްތަކެއް ފަތުރަން މަސައްކަތްކުރާ ހަރަކާތެއްކަމަށް ބައެއް ފަރާތްތަކުން ތުހުމަތުކުރެއެވެ. ޚާއްސަކޮށް، ލިވާތުކުރުން ފަދަ ޖިންސީ ފާހިޝް އަމަލުތައް ޕްރޮމޯޓުކުރުމަށް މި ޝޯ މެދުވެރިކޮށް މަސައްކަތްކުރާ ކަމަށް ބުނެ ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ. މިފަދަ ތުހުމަތުތަކެއް އޮތް ޝޯއެއް ބޭއްވުމަށް މޭޔަރު ވަކާލާތު ކުރެއްވުމުން، މޭޔަރުގެ އެ ވާހަކަތަކަކީ އެފަދަ ފާހިޝް އަމަލުތަކަށް ހިތްވަރު ދިނުމުގެ ގޮތުން ދެއްކެވި ވާހަކަތަކެއްކަމަށް ގިނަ ބަޔަކު ދެކެއެވެ.
ރާއްޖޭގެ ސަޤާފަތާއި ދީނާ ފުށުއަރާ މިފަދަ ހަރަކާތްތަކަކީ ޤާނޫނު އަސާސީން ވެސް ހުއްދަ ނުދޭ ކަންކަމަށް ވާއިރު، މޭޔަރެއްގެ ހައިސިއްޔަތުން ހުންނަވައިގެން، މިފަދަ ހަރަކާތްތަކަށް ތާއީދު ކުރެއްވުމަކީ ޒިންމާދާރުކަމެއް ނޫން ކަމަށް ފާޑުކިއުންތެރިން ބުނެއެވެ.
ވިޔަފާރީގެ ނަމުގައި ރާއްޖޭގެ އިސްލާމީ އަގީދާއާއި ޤާނޫނުތަކާ ޚިލާފު ކަންކަން ޕްރޮމޯޓު ކުރުމަކީ ބަލައިގަނެވޭނެ ކަމެއް ނޫން ކަމަށާއި، މޭޔަރުގެ މޭޔަރުގެ އެ ވާހަތަކަކީ ފާޅުގައި އެފަދަ ކަންކަމަށް ވާގިވެރިވުން ކަމަށް ގިނަ ބަޔަކު ސިފަކުރެއެވެ.
“ބިޔޯން އަގެއިން“ ޝޯ ކެންސަލްކުރީ އެ ޝޯ ބާއްވަން އުޅޭތަކުގެ މަރާމާތުގެ މަސައްކަތްތަކެއް ކުރާތީ ކަމަށް ސްޕޯޓްސް މިނިސްޓްރީން ވަނީ ބުނެފައެވެ.
