ޤައުމީ ޚިދުމަތުގައި ގިނަދުވަސްތަކެއް ވަންދެން މަސައްކަތް ކުރައްވާފައިވާ، ތަޖުރިބާކާރު ބޭފުޅުންގެ މައްޗަށް އެކުލެވޭ ޚާއްޞަ މަޝްވަރާ މަޖިލީހެއް އުފެއްދެވުމަށް ނިންމަވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ.
ޕީއެސްއެމް ނިއުސްގެ ”ނޭޝަން ޗެޓް“ ޕްރޮގްރާމްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ދައުލަތުގެ ކަންކަމުގައި މަޝްވަރާ ހޯއްދެވުމަށްޓަކައި ދެ މަޖިލީހެއް އުފެއްދެވުމަށް ޤަޞްދުކުރައްވާ ކަމަށެވެ. މީގެ ތެރެއިން އެއް މަޖިލީހަކީ ޤައުމަށް އެންމެ ޚިދުމަތްތެރި، އަދި އެންމެ ގިނަ ދުވަހު ދައުލަތުގެ މަތީ މަޤާމުތައް ފުރުއްވާފައިވާ ބޭފުޅުންގެ މައްޗަށް އެކުލެވޭ ކުޑަ މަޖިލީހެއް ކަމަށް ރައީސް ފާހަގަކުރެއްވިއެވެ.
ރައީސް މުޢިއްޒު ވިދާޅުވި ގޮތުގައި، މިފަދަ މަޖިލީހެއް އުފެއްދެވުމުގެ މައިގަނޑު މަޤްޞަދަކީ ޤައުމުގެ ކަންކަމުގައި ބަސް ވިދާޅުވެ، ޚިޔާލު ދެއްވަން ބޭނުންފުޅުވާ ތަޖުރިބާކާރު ބޭފުޅުންގެ ފަންނީ ލަފާ ސަރުކާރަށް ހޯދުމެވެ. މި މަޖިލީހުގެ ސަބަބުން ސަރުކާރުގެ ސިޔާސަތުތަކާއި، ދައުލަތުގެ ނިޒާމުގެ ތެރޭގައި ހުރި އެކި ކަންކަމާ ގުޅޭގޮތުން އެ ބޭފުޅުންގެ އިސްނެންގެވުމާއެކު ނުވަތަ ރައީސް އެދިވަޑައިގަންނަވާ ކަންކަމުގައި މަޝްވަރާ ދެއްވުމުގެ ފުރުޞަތު ފަހިވެގެންދާނެއެވެ.
”އެފަދަ ބޭފުޅުންގެ މައްޗަށް އެކުލެވޭ މަޝްވަރާ މަޖިލީހެއް އިރާދަކުރެއްވިއްޔާ މި ހަދަނީ. އޭރުން އަޅުގަނޑު ބައެއް ފަހަރު ކަންކަމުގައި ދަންނަވާލުމުން މަޝްވަރާ ދެއްވުމާއި، އެބޭފުޅުން އިސްނަންގަވައިގެން ސަރުކާރުގެ ކަންކަމުގައި، ދައުލަތުގެ ކަންކަމުގައި، ނިޒާމުގެ ކަންކަމުގައި މިހެން ގޮސް ކޮންމެ ކަމެއްގައި ވެސް ޚިޔާލާއި މަޝްވަރާ ދެއްވޭނެ،“ ރައީސް ވިދާޅުވިއެވެ.
މި ނިންމެވުމަކީ ޤައުމުގެ ކަންކަން ނިންމުމުގައި ތަޖުރިބާކާރު އިސް ބޭފުޅުންގެ ލަފައާއި އިރުޝާދު ހޯދައި، ޤައުމީ ތަރައްޤީގައި އެ ބޭފުޅުންގެ ޚިދުމަތް ދެމެހެއްޓެނިވި ގޮތެއްގައި ބޭނުންކުރުމަށް އެޅޭ މުހިންމު ފިޔަވަޅެއްގެ ގޮތުގައި ބެލެވެއެވެ.
