މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ މަގުބޫލު ”ފަސްމީރު“ ބްރޭންޑުގެ ތަފާތު ރަހަތައް ހިމެނޭހެން ފަރުމާކޮށްފައިވާ ޚާއްސަ ހަދިޔާ ޕެކެއް އެކުންފުނިން މިއަދު ތަޢާރަފުކޮށްފިއެވެ.
މި ޕެކޭޖަކީ އާއިލާ އާއި ރަހުމަތްތެރިންނަށް ހަދިޔާކުރުމަށާއި، ދިވެހިވަންތަ ކަނޑުމަހުގެ މީރު ރަހަތައް އެހެން ފަރާތްތަކަށް ތަޖުރިބާކޮށްލުމުގެ ފުރުސަތު ދިނުމަށް ޚާއްސަކޮށް ފަރުމާކޮށްފައިވާ އުފެއްދުމެކެވެ. ޚާއްސަކޮށް ރާއްޖެއިން ބޭރަށް ދަތުރުކުރާ ފަރާތްތަކަށާއި، ރާއްޖެ އަންނަ ފަތުރުވެރިންނަށްވެސް މިއީ ދިވެހި އުފެއްދުމެއް ހަދިޔާކޮށްލުމަށް ލިބޭ ރަނގަޅު ފުރުސަތެކެވެ.
ޖުމުލަ 12 މަސްދަޅު ހިމެނޭ މި ހަދިޔާ ޕެކްގައި ފަސްމީރު ބްރޭންޑުގެ މަގުބޫލު 4 ރަހައެއް ހިމެނެއެވެ. އެއީ:
ކަނޑުމަސް ގިތެޔޮ މިރުހާއެކު
ކަނޑުމަސް ލުނބޮޔާއި މިރުހާއެކު
ކަނޑުމަސް އަސޭމިރުހާއެކު
ކަނޑުމަސް ހިކި މިރުހާއެކު
ކޮންމެ ވައްތަރަކުން 3 ދަޅު ހިމެނޭ މި ޕެކޭޖަކީ އަގުގެ ގޮތުން ބަލާއިރުވެސް ކަސްޓަމަރުންނަށް ލިބިގެންދާ ވަރަށް ބޮޑު ލުޔެކެވެ. އެގޮތުން ވަކިވަކިން މަސްދަޅު ގަންނަން ލިބޭ އަގަށްވުރެ ހެޔޮ އަގެއްގައި، މި ހަދިޔާ ޕެކް މިހާރު 221 ރުފިޔާއަށް ލިބެން ހުންނާނެއެވެ.
ބޭނުން ފަރާތަކަށް ހަދިޔާގެ ގޮތުގައި ދެވޭގޮތަށް ތައްޔާރުކޮށްފައިވާ މި ޕެކޭޖުގެ ފަރުމާގައި ހަދިޔާ ލިބޭ ފަރާތުގެ ނަން ޖަހައިލެވޭނެ ޖާގައެއް ހިމަނާފައިވެއެވެ. މިއީ ދަތުރުފަތުރު ކުރާއިރު ފޮއްޓަށް ނުވަތަ ދަބަހަށް ލައިގެން ފަސޭހައިން އުފުލޭނެހެން، ރައްކާތެރިކަމާއެކު ބަންދުކޮށްފައިވާ ޕެކެކެވެ.
މިފްކޯއިން ހާމަކުރި ގޮތުގައި، ފަސްމީރު ބްރޭންޑުގެ ފެންވަރު ރަގަޅު އުފެއްދުންތަކުގެ އެކި ރަހަތައް ހިމެނޭހެން ތަޢާރަފުކުރި މި ހަދިޔާ ޕެކަކީ، ކަސްޓަމަރުންގެ ބޭނުންތަކަށް ރިޢާޔަތްކޮށް، އައު އީޖާދުތަކާއެކު ފެންވަރު މަތީ އުފެއްދުންތައް ފޯރުކޮށްދިނުމަށް އެކުންފުނިން ކުރަމުންދާ މަސައްކަތުގެ ބައެކެވެ. މީގެ މައިގަނޑު ބޭނުމަކީ ކަސްޓަމަރުންނާ އޮންނަ ގުޅުން އިތުރަށް ބަދަހިކޮށް، ދިވެހި އުފެއްދުންތަކަށް އޮތް އިތުބާރު ދެމެހެއްޓުމެވެ.
ފަސްމީރުގެ މީރު ރަހަތައް އެއް ފޮއްޓަކުން ތަޖުރިބާކޮށްލެވޭ މި ހަދިޔާ ޕެކް، މާލެއާއި ހުޅުމާލޭގައި ގާއިމުކޮށްފައިވާ މިފްކޯގެ މަސްފިހާރަތަކުން މިހާރު ކަސްޓަމަރުންނަށް ބައްލަވައިގަނެވޭނެއެވެ.
