ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) އަށް މިއަހަރުގެ ދެވަނަ ކުއާޓަރުގައި ސާފު ފައިދާގެ ގޮތުގައި 280 މިލިއަން ރުފިޔާ ލިބިފައިވާކަން އެ ކުންފުނީގެ މާލީ ހިސާބުތަކުން ހާމަވެއްޖެއެވެ.
އެސްޓީއޯއިން އާންމުކޮށްފައިވާ މިއަހަރުގެ ދެވަނަ ކުއާޓަރުގެ މާލީ ރިޕޯޓަށް ބަލާއިރު، މިއީ މިއަހަރުގެ ފުރަތަމަ ކުއާޓަރުގައި ލިބުނު 276 މިލިއަން ރުފިޔާގެ ސާފު ފައިދާއާ އަޅާބަލާއިރު 1.2 އިންސައްތަ އިތުރުވުމެކެވެ. އަދި މިއީ މިދިޔަ އަހަރުގެ ދެވަނަ ކުއާޓަރާ އަޅާބަލާއިރު 71 އިންސައްތައިގެ ބޮޑު ކުރިއެރުމެކެވެ.
މި ކުއާޓަރުގައި އެސްޓީއޯއަށް ޖުމްލަ އާމްދަނީގެ ގޮތުގައި 6.98 ބިލިއަން ރުފިޔާ ލިބިފައިވެއެވެ. މިއީ ފުރަތަމަ ކުއާޓަރުގައި ލިބުނު 5.48 ބިލިއަން ރުފިޔާއާ އަޅާބަލާއިރު 27 އިންސައްތައިގެ އިތުރުވުމެކެވެ. އާމްދަނީ އިތުރުވުމުގެ މައިގަނޑު ސަބަބަކީ މެދުއިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލިފައިވުން ކަމަށް އެސްޓީއޯއިން ބުނެފައިވެއެވެ.
ނަމަވެސް، ތެލުގެ އަގު ދުނިޔޭގެ ބާޒާރުގައި ބޮޑުވި ނަމަވެސް، ރާއްޖޭގެ ބާޒާރުގައި ތެލުގެ އަގު ކޮންޓްރޯލް ކުރުމަށް ސަރުކާރާއި އެސްޓީއޯއިން ކުރި މަސައްކަތުން ރައްޔިތުންނަށް ފޯރުކޮށްދޭ ތެލުގެ އަގުތައް ނިސްބަތުން މަތިނުކޮށް ހިފެހެއްޓުނެވެ. މީގެ ނަތީޖާއެއްގެ ގޮތުން ތެލުގެ ވިޔަފާރިން ލިބުނު މާޖިން ކުޑަވެ، އެ ދާއިރާގެ ޖުމްލަ ފައިދާ ވަނީ ދަށްވެފައެވެ. އެހެންނަމަވެސް، ކުންފުނީގެ އެހެނިހެން ވިޔަފާރިތަކުން ލިބުނު ފައިދާ އިތުރުވުމުގެ ސަބަބުން، ޖުމްލަ ފައިދާއަށް ކުރި އަސަރު ކުޑަކުރެވިފައިވާ ކަމަށް އެ ކުންފުނިން ފާހަގަކުރެއެވެ.
މާލީ ރިޕޯޓުގައިވާ ގޮތުން، ޓެކުހަށް ކެނޑުމުގެ ކުރިން އެ ކުންފުންޏަށް މި ކުއާޓަރުގައި 335 މިލިއަން ރުފިޔާގެ ފައިދާއެއް ލިބިފައިވެއެވެ. މިއީ ފުރަތަމަ ކުއާޓަރުގައި ލިބުނު 330 މިލިއަން ރުފިޔާއާ އަޅާބަލާއިރު 1.4 އިންސައްތައިގެ ކުރިއެރުމެކެވެ.
ސަރުކާރުން އިޤްތިޞާދީ ހަމަޖެހުން ގާއިމުކުރުމަށް ކުރަމުންދާ މަސައްކަތްތަކުގެ ތެރެއިން، ދައުލަތުގެ އެންމެ ބޮޑު ވިޔަފާރި ކުންފުނި ކަމަށްވާ އެސްޓީއޯއިން އަންނަނީ ކުންފުނީގެ ހިންގުން ހަރުދަނާކޮށް މާލީ ނަތީޖާ ރަނގަޅުކުރުމަށް ގިނަ ފިޔަވަޅުތަކެއް އަޅަމުންނެވެ.
ތިފައިސާ އައްވަނީ ކިހިނެއް މިއުޅެންޖެހެނީ ބޭސް ގުޅައެއްވެސް ނުލިބިގެން.