މޯލްޑިވްސް ރިޓަޔަރމަންޓް ޕެންޝަން ސްކީމްގެ ބައިވެރިންނަށް އެމީހުންގެ ޕެންޝަން ފަންޑުގައި ހުރި ފައިސާ ބޭނުންކޮށްގެން ހައްޖު ކިޔުއަށް އެރޭނެ އިންތިޒާމް ސަރުކާރުން ހަމަޖައްސައިފިއެވެ.
ޕެންޝަނާ ބެހޭ ޤާނޫނަށް މިއަހަރު ގެނައި އިސްލާޙާ ގުޅޭގޮތުން މަޢުލޫމާތު ދެއްވަމުން ޕެންޝަން އޮފީހުން ބުނީ، ސަރުކާރުގެ ހައްޖު ކުންފުނި މެދުވެރިކޮށް ހައްޖަށް ދިޔުމަށް ބޭނުންވާ ފަރާތްތަކަށް، ހައްޖަށް ދިޔުމަށް ދައްކަންޖެހޭ އަގުގެ %20 އަމިއްލައަށް ދެއްކުމުން، ބާކީ އޮތް %80 ފައިސާ ޕެންޝަން ފަންޑުން ހަމަޖައްސައިދޭނެ ކަމަށެވެ. މިއާއެކު، ހައްޖަށް ދިޔުމަށް ކަނޑައަޅާފައިވާ ރަސްމީ ކިޔުގެ ތަރުތީބުން އެމީހަކަށް ޖާގަ ރިޒާވްކޮށް، ކިޔުއަށް އެރުމުގެ ފުރުޞަތު ލިބިގެންދާނެއެވެ.
މި އިންތިޒާމުގެ ދަށުން ހައްޖު ކިޔުއަށް އެރޭނީ ވަކި ޝަރުތުތަކެއް ފުރިހަމަވާ ފަރާތްތަކަށެވެ.
އެގޮތުން:
ފަރުޟު ޙައްޖުގެ އަޅުކަން މީގެ ކުރިން އަދާކޮށްފައިނުވާ ފަރާތަކަށް ވުން.
ޕެންޝަން ލިބޭ އުމުރު ހަމަވާއިރު، މަހަކު މަދުވެގެން 2000 ރުފިޔާ ޕެންޝަންގެ ގޮތުގައި ލިބޭ މިންވަރަށް ރިޓަޔަރމަންޓް ސޭވިންގްސް އެކައުންޓުގައި ފައިސާ ހުރުން.
ޕެންޝަން އޮފީހުން ހާމަކޮށްފައިވާ ގޮތުގައި، މިގޮތަށް ފައިސާ ދޫކުރާއިރު ގެދޮރު ގަތުމުގެ ޑައުންޕޭމަންޓަށް ޕެންޝަން ފަންޑުން ފައިސާ ބޭނުންކޮށްފައިވާނަމަ، އެ ފައިސާ އުނިކުރުމަށްފަހު ބާކީ ހުރި މިންވަރު ބަލާނެއެވެ. އަދި މި ޕްރޮގްރާމްގެ ދަށުން ފައިސާ ދޫކުރެވޭނީ ރިޓަޔަރމަންޓް ސޭވިންގްސް އެކައުންޓް ބެލެންސްގައި 336,000 ރުފިޔާއަށް ވުރެ ގިނައިން ފައިސާ ހުރި މެންބަރުންނަށެވެ.
ޕެންޝަން އޮފީހުގެ ޗީފް ފައިނޭންޝަލް އޮފިސަރ އަޙްމަދު ސިނާން ވިދާޅުވީ، ހައްޖަށް ދިޔުމުގެ ޖާގަ ރިޒާވްކުރުމަށްޓަކައި ސަރުކާރުގެ ހައްޖު ކުންފުންޏާއެކު އެއްބަސްވުމެއްގައި ސޮއިކުރަންޖެހޭ ކަމަށެވެ. އަދި މިކަމަށް ބޭނުންވާ ގަވާއިދުތަކާއި އިދާރީ އިންތިޒާމްތައް ކުރިއަށް އޮތް 3 މަސްދުވަހުގެ ތެރޭގައި ފުރިހަމަކުރުމުގެ މަސައްކަތް މިހާރު ކުރިއަށްދާ ކަމަށްވެސް އޭނާ ވިދާޅުވިއެވެ.
2019 ވަނަ އަހަރު ޕެންޝަން ޤާނޫނަށް ގެނައި އިސްލާހާއެކު ހައްޖަށް ދިޔުމަށް ޕެންޝަން ފަންޑު ބޭނުންކުރެވޭ ގޮތް ހެދި ނަމަވެސް، ރައީސް ޑރ. މުޙައްމަދު މުޢިއްޒުގެ ސަރުކާރުން މިވަނީ މިކަމަށް އިތުރު ލުއިތަކެއް ދީ، ކިޔުއަށް އެރުމުގައި ޕެންޝަން ފަންޑުގެ އެހީތެރިކަން ލިބޭނެ މަގު ފަހިކޮށްދީފައެވެ. މި ބަދަލުގެ ސަބަބުން ގިނަ ބަޔަކަށް ފަރުޟު ހައްޖުގެ އަޅުކަން އަދާކުރުމަށް މާލީ ގޮތުން ބޮޑު ލުޔެއް ލިބިގެންދާނެއެވެ.
