ވެލާނާ އިންޓަނޭޝަނަލް އެއާޕޯޓް (ވީ.އައި.އޭ) އިން ފުރާ ފަސިންޖަރުންނަށް ލިބޭ ހިދުމަތްތައް ފުޅާކޮށް، ފަސޭހަ މާހައުލެއް ގާއިމުކުރުމުގެ ގޮތުން އެއާޕޯޓުގެ ޓާމިނަލް 1 ގައި އަރާމުކުރާނެ ހާއްސަ އާ ޖާގައެއް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން މިއަދު ހުޅުވައިފިއެވެ.
މިއަދު ބޭނުންކުރަން ފެށި މި އާ ސަރަހައްދަކީ އެއާޕޯޓުން ދަތުރުކުރާ ފަރާތްތަކަށް ލިބޭ ހިދުމަތްތަކުގެ ފެންވަރު މަތިކުރުމަށް އެމް.އޭ.ސީ.އެލް އިން ކުރިއަށްގެންދާ މަޝްރޫއުގެ ދަށުން ގާއިމުކުރި ތަނެކެވެ. ޓާމިނަލްގެ ފުރަތަމަ ބުރީގައި ތަރައްގީކޮށްފައިވާ މި ސަރަހައްދާއެކު، ފަސިންޖަރުން މަޑުކޮށްލައިގެން ތިބުމަށް 750 އަކަމީޓަރުގެ ބޮޑު ޖާގައެއް ވަނީ އިތުރުވެފައެވެ. މިތަނުގައި ދަތުރުވެރިންނަށް ފުރުމުގެ ކުރިން އަރާމުކޮށްލެވޭނެ ފަދަ ހިތްގައިމު ގޮނޑިތަކާއި ވަސީލަތްތައް ވަނީ ގާއިމުކޮށްފައެވެ.
މި ޖާގައިގެ އެންމެ ފާހަގަކޮށްލެވޭ އެއް ބަޔަކީ ކުޑަކުދިންނަށް ހާއްސަކޮށްގެން ހަދާފައިވާ 136 އަކަމީޓަރުގެ ކުޅޭ ސަރަހައްދެވެ. މި ސަރަހައްދު ފަރުމާކޮށްފައިވަނީ ތަފާތު ލެވެލްތަކުގެ ޕްލޭ ފްލެޓްފޯމްތަކާއި، ރައްކާތެރި ހޮޅިތަކުގެ އިތުރުން ވާ އަދި ރިންގު ބޭނުންކޮށްގެން ކުޅެވޭނެ ވަސީލަތްތަކާ އެކުގައެވެ. މީގެ އިތުރުން ބޯޅަ ކުޅޭ ޖާގައެއް ވެސް ހިމެނޭ މި ސަރަހައްދަކީ އާއިލާތަކަށް އަމާން އަދި އުފާވެރި ވަގުތުކޮޅެއް ހޭދަކުރެވޭނެ ގޮތަށް ތައްޔާރުކޮށްފައިވާ ތަނެކެވެ.
ދަތުރުވެރިންނަށް ބޭނުންވާ މާލީ ހިދުމަތްތައް ފޯރުކޮށްދިނުމުގެ ގޮތުން، މި އާ ޖާގައިގައި ބޭންކް އޮފް މޯލްޑިވްސް (ބީ.އެމް.އެލް) ގެ ހާއްސަ ކައުންޓަރެއް ވެސް ވަނީ ގާއިމުކޮށްފައެވެ. މި ކައުންޓަރު މެދުވެރިކޮށް ބޭރު ފައިސާ މާރުކުރުމާއި، ރާއްޖޭން ބޭރަށް ފުރާ ދިވެހިންނަށް ޑޮލަރު ދޫކުރުމުގެ ހިދުމަތް ލިބިގެންދާނެއެވެ.
އެމް.އޭ.ސީ.އެލް އިން ބުނި ގޮތުގައި، ޓާމިނަލް 1 އަށް ގެނެވުނު މި ބަދަލަކީ ވީ.އައި.އޭ އަކީ ޒަމާނީ، ފަސިންޖަރުންގެ ބޭނުންތަކަށް އިސްކަންދޭ އެއާޕޯޓަކަށް ހެދުމަށް އެ ކުންފުނިން ކުރަމުންދާ މަސައްކަތުގެ މުހިންމު ބައެކެވެ. މި އާ ޖާގައާއެކު އެއާޕޯޓުގެ ތޮއްޖެހުން ކުޑަވެ، ދަތުރުވެރިންނަށް އިތުރު ލުއިފަސޭހަކަމެއް ލިބިގެންދާނެ ކަމަށް އެ ކުންފުނިން އުންމީދު ކުރެއެވެ.
