މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހިންގަމުންދާ އުމްރާނީ ތަރައްޤީގެ މަޝްރޫޢުތަކުގެ ތެރެއިން، އަންނަ 2025 ވަނަ އަހަރުގެ ތެރޭގައި 500 އެއްހާ މަޝްރޫޢު ނިންމުމަށް މަސައްކަތް ކުރަމުންދާ ކަމަށް އެ ކުންފުނީގެ މެނޭޖިންގ ޑިރެކްޓަރ އަޙްމަދު ސަޢުދީ ވިދާޅުވެއްޖެއެވެ.
ޕީއެސްއެމް ނިއުސްއަށް ދެއްވި އިންޓަވިއުއެއްގައި ސަޢުދީ ވިދާޅުވީ، އެމްޓީސީސީން މިހާރުވެސް ރާއްޖޭގެ އެކި ކަންކޮޅުތަކުގައި ގިނަ އަދަދެއްގެ މަޝްރޫޢުތަކެއް ކުރިއަށްގެންދާ ކަމަށެވެ. އެގޮތުން މި ހިނގާ 2024 ވަނަ އަހަރުގެ ނިޔަލަށް 28 މަޝްރޫޢެއްގެ މަސައްކަތް އެއްކޮށް ނިންމާލުމަށް އަމާޒު ހިފާފައިވާ ކަމަށް އޭނާ ފާހަގަކުރެއްވިއެވެ.
ސަޢުދީ ވިދާޅުވި ގޮތުގައި އެ ކުންފުނިން މިހާރުވެސް 719 މަޝްރޫޢެއް އެކި މަރުހަލާތަކުގައި ކުރިއަށް އެބަގެންދެއެވެ. މީގެ އިތުރުން 587 މަޝްރޫޢެއްގައި ސޮއިކޮށް، އަމަލީ މަސައްކަތް ފެށުމަށް ވާންޖެހޭ ތައްޔާރީތައް ވަމުންދާ ކަމަށް އޭނާ ވިދާޅުވިއެވެ.
”2027 ވަނަ އަހަރު ނިމެންވާއިރަށް 500 އާ ގާތްކުރާ އަދަދަކަށް މަޝްރޫޢުތައް ނިންމަންޖެހޭ. ޚާއްސަ އިސްކަމެއް ދީގެން އަންނަ ދިރާސީ އަހަރަށް ތަޢުލީމީ ދާއިރާގައި ހަވާލުކޮށްފައިވާ މަޝްރޫޢުތައް ނިންމުމަށް ދަނީ މަސައްކަތްކުރަމުން،“ ސަޢުދީ ވިދާޅުވިއެވެ.
އޭނާ އިތުރަށް ވިދާޅުވީ އަންނަ އަހަރަކީ އެންމެ ގިނަ މަޝްރޫޢުތައް ނިންމަން ޖެހޭ އަހަރު ކަމަށްވާތީ، އެ މަސައްކަތްތައް ހަލުވިކަމާއެކު ކުރިއަށްގެންދެވޭނެ ގޮތަށް ކުންފުނީގެ މަސައްކަތްތައް ތަރުތީބު ކުރަމުންދާ ކަމަށެވެ. މި މަޝްރޫޢުތަކުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންނަށް ވެވަޑައިގެންފައިވާ ވައުދުފުޅުތަކާ ގުޅޭ މުހިންމު މަސައްކަތްތައް ހިމެނޭކަންވެސް އޭނާ ފާހަގަކުރެއްވިއެވެ.
ރައީސް ޑރ. މުޢިއްޒުގެ ސަރުކާރުން މަގާމާ ހަވާލުވި 17 ނޮވްމެބަރު 2023 އިން ފެށިގެން މިހާތަނަށް އެމްޓީސީސީން ވަނީ 50 މަޝްރޫޢެއްގެ މަސައްކަތް ނިންމާފައެވެ. މީގެ ތެރޭގައި ބިން ހިއްކުމާއި، ގޮނޑުދޮށް ހިމާޔަތްކުރުމުގެ 14 މަޝްރޫޢަކާއި، ބަނދަރު ހެދުމުގެ 10 މަޝްރޫޢެއް ހިމެނެއެވެ.
މ