ޖޫން މަހުގެ ފަހުކޮޅުން ފެށިގެން ޕާކިސްތާނަށް ކުރަމުންދާ މޫސުމީ ވިއްސާރައާއި ފެންބޮޑުވުމުގެ ހާދިސާތަކުގައި މަދުވެގެން 107 މީހުން ނިޔާވެ، 344 މީހުން ޒަޚަމްވެއްޖެ ކަމަށް އެ ޤައުމުގެ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އެންމެ ގިނަ މީހުން ނިޔާވެފައިވަނީ ޚައިބަރު ޕަޚްތުންޚުވާ ޕްރޮވިންސުންނެވެ. އެ ސަރަހައްދުން 55 މީހުން ނިޔާވެފައިވާއިރު، ޕަންޖާބު ޕްރޮވިންސުން 36 މީހުން ވަނީ ނިޔާވެފައެވެ. އެންޑީއެމްއޭއިން ބުނާ ގޮތުގައި މީގެ ތެރެއިން ދެބައިކުޅަ އެއްބަޔަށްވުރެ ގިނަ މީހުން ނިޔާވެފައުވަނީ ބޯކޮށް ވާރޭވެހުމުގެ ސަބަބުން ގެތަކާއި ފުރާޅުތައް ވެއްޓިގެންނެވެ.
ޕަންޖާބުގެ ވެރިރަށް ލާހޯރާއި ގުޖްރަންވާލާ ސަރަހައްދުގެ 400 އަކަ ކިލޯމީޓަރުގެ ސަރަހައްދެއްގައި ވަނީ ފެންބޮޑުވެފައެވެ. އަދި ޙާލުގައި ޖެހުނު މީހުންނަށް އެހީވުމަށް ލާހޯރުގައި 17 ރިލީފް ކޭމްޕް ވަނީ ޤާއިމުކޮށްފައެވެ.
ޕާކިސްތާނުގެ މޫސުމާބެހޭ އިދާރާއިން ވަނީ ކުރިއަށް އޮތް ދުވަސްތަކުގައިވެސް ބޯކޮށް ވާރޭވެހޭނެ ކަމަށް ލަފާކޮށް، އާންމުން ސަމާލުވުމަށް އަންގާފައެވެ. މޫސުމީ ވިއްސާރަ އާންމުކޮށް ސެޕްޓެމްބަރު މަހާ ހަމައަށް ދެމިގެންދާނެއެވެ.
