ފާއިތުވި 24 ގަޑިއިރު ރާއްޖޭގެ އެކި ހިސާބުތަކަށް ކުރި ވިއްސާރައިގައި އެންމެ ބޯކޮށް ވާރޭވެހިފައިވަނީ ފުވައްމުލައް ސިޓީއަށް ކަމަށް މޫސުމާއި ބެހޭ ގައުމީ އިދާރާ (މެޓް) އިން ހާމަކޮށްފިއެވެ.
މެޓް އޮފީހުން އާންމުކުރި ތަފާސްހިސާބުތަކަށް ބަލާއިރު، ފާއިތުވި 24 ގަޑިއިރުގެ ތެރޭގައި ފުވައްމުލަކަށް ވަނީ 46.5 މިލިމީޓަރުގެ ވާރޭ ވެހިފައެވެ. މި ލިސްޓުގެ ދެވަނައިގައި އޮތީ ސ. ހުޅުމީދޫއެވެ. އެ ރަށަށް 16.6 މިލިމީޓަރުގެ ވާރޭ ވެހިފައިވާ ކަމަށް މެޓުން ބުނެއެވެ.
މީގެ އިތުރުން ދެން އެންމެ ގިނައިން ވާރޭ ވެހުނު ރަށްތަކަކީ:
ބ. ގޮއިދޫ: 12.9 މިލިމީޓަރު
އއ. ތޮއްޑޫ: 11.1 މިލިމީޓަރު
ރ. އިފުރު: 11.0 މިލިމީޓަރު
މި ދުވަސްވަރަކީ ރާއްޖޭގެ އެކި ސަރަހައްދުތަކަށް މޫސުން ގޯސް ދުވަސްވަރަކަށް ވުމާއެކު، މިއަދު ރާއްޖޭގެ ބޮޑު ބަޔަކަށް އުދަ އަރާނެ ކަމަށް ވެސް މެޓް އޮފީހުން ވަނީ ލަފާކޮށްފައެވެ. މިގޮތުން މިއަދު ހެނދުނު 10:30 އިން ފެށިގެން މެންދުރުފަހު 15:00 އާ ހަމައަށް މުޅި ރާއްޖެއަށް ވަނީ ހުދު ސަމާލު ނެރެފައެވެ.
މެޓް އޮފީހުން މިއަދު އިރުއޮއްސި 18:00 އާ ހަމައަށް ނެރުނު މޫސުމީ އެޑްވައިޒަރީގައިވާ ގޮތުން، ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރު ކުރުމަކީ އެކަށީގެންވާ ކަމެކެވެ. އެހެންކަމުން ހުރިހާ ފަރާތްތަކުން ވެސް މޫސުމަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފައެވެ.
