ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންނަށް އިނާމު ދިނުމަށް މިނިވަން ދުވަހަކީ އެންމެ މުނާސަބު ދުވަސް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިނިވަން ދުވަހުގެ މުނާސަބަތުގައި ބޭއްވެވި ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، މިނިވަން ދުވަހެއްގައި ދައުލަތަށް ޚިދުމަތް ކުރުމުގެ އިނާމު ދިނުމާ މެދު ބައެއް ފަރާތްތަކުން ސުވާލު އުފައްދާފާނެ ކަމަށެވެ. ނަމަވެސް، އެމަނިކުފާނު ގަބޫލުކުރައްވާ ގޮތުގައި މިއީ މިކަމަށް އެންމެ އެކަށީގެންވާ ދުވަހެވެ.
ރައީސް ޑރ. މުޢިއްޒު ފާހަގަކުރެއްވި ގޮތުގައި، ދައުލަތަށް ގިނަ ދުވަހު ޚިދުމަތް ކުރެއްވި ބޭފުޅުންގެ މަސައްކަތުގެ އަޚްލާޤަކީ މިއަދުގެ ޖީލުން ފުންކޮށް ވިސްނާލަންޖެހޭ ކަމެކެވެ. އިނާމު ލިބިވަޑައިގެންނެވި ކޮންމެ ބޭފުޅަކީވެސް އެ ބޭފުޅުންގެ ޚިދުމަތުގެ މުއްދަތުގައި ނަމޫނާ ސިފަތަކެއް ދެއްކެވި ބޭފުޅުންކަން ރައީސް ފާހަގަކުރެއްވިއެވެ.
”މިއިން ކޮންމެ ބޭފުޅަކު އެ ކުރެއްވި ޚިދުމަތުގެ އަގު މިތަނުގައި ވަޒަންކުރެވިގެންދިޔައީ، އެ ބޭފުޅުން އެ ކުރެއްވި ޚިދުމަތުގައި ދެމިތިއްބެވިހާ ދުވަހަކު، އެ ބޭފުޅުންގެ ކިބައިން ވަރަށް މަތިވެރި ސިފަފުޅުތަކެއް ފެނިގެން ގޮސްފައިވާތީ،“ ރައީސް ވިދާޅުވިއެވެ.
ޚިދުމަތްތެރިންގެ ކިބައިން ފެނިގެންދިޔަ މުހިންމު ސިފަތަކުގެ މައްޗަށް އަލިއަޅުއްވާލައްވަމުން ރައީސް ވިދާޅުވީ، ނަޒާހަތްތެރިކަމާއި، އަމާނާތްތެރިކަމާއި، ވަފާތެރިކަން އެ ބޭފުޅުން އިސްކުރެއްވި ކަމަށެވެ. މީގެ އިތުރުން، މުރާލިކަމާއި، އިޚްލާޞްތެރިކަމާއި، ކެތްތެރިކަމުގެ އިތުރުން ކަމަށްކަމޭހިތުމުގެ މަތިވެރި ސިފަ އެ ބޭފުޅުންގެ ކިބައިން ފެނިގެން ގޮސްފައިވާކަން ރައީސް ފާހަގަކުރެއްވިއެވެ.
މި ރަސްމިއްޔާތުގައި ދައުލަތަށް ގިނަ ދުވަހު ޚިދުމަތް ކުރެއްވި ގިނަ އަދަދެއްގެ ބޭފުޅުންނަށް ވަނީ ޝަރަފުގެ ބެޖާއި އައްޑަނަ އަރުވާފައެވެ. މި ޖަލްސާގައި ރައީސުލްޖުމްހޫރިއްޔާގެ ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފާއި، މަޖިލީހުގެ ރައީސް ޢަބްދުއްރަޙީމް ޢަބްދުﷲ ވެސް ބައިވެރިވެވަޑައިގެންނެވިއެވެ.
