ދިވެހިރާއްޖޭގެ ފަޚުރުވެރި 61 ވަނަ މިނިވަން ދުވަހުގެ އުފާވެރި މުނާސަބަތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުޙައްމަދު، ދިވެހި އެންމެހައި ރައްޔިތުންނަށް ތަހުނިޔާއާއި ހެޔޮއެދުންތައް ފޮނުއްވައިފިއެވެ.
މިނިވަން ދުވަހުގެ މުނާސަބަތުގައި ސޯޝަލް މީޑިއާ މެދުވެރިކުރައްވައި ކުރެއްވި ޕޯސްޓެއްގައި، މެޑަމް ސާޖިދާ ވަނީ ހިތްތަކުގައި ޤައުމީ ލޯބީގެ ފަޚުރާއި ޝަރަފު އުތުރިއަރަމުންދާ މި އުފާވެރި ދަނޑިވަޅުގައި، ރާއްޖޭގެ އެންމެހައި އަޚުންނާއި އުޚުތުންނަށް ދުވަހުގެ ތަހުނިޔާ އިޚްލާޞްތެރިކަމާއެކު އަރިސްކުރައްވާފައެވެ.
މެޑަމް ސާޖިދާގެ މެސެޖުގައި، ދިވެހިރާއްޖެއަށް މިއަދު ލިބިފައިވާ މިނިވަންކަމުގެ މަތިވެރި ނިއުމަތަކީ މާޒީގައި އަޅުގަނޑުމެންގެ ކާބަފައިން ކުރެއްވި މަތިވެރި ޤުރުބާނީތަކެއްގެ ނަތީޖާކަން ފާހަގަކުރެއްވިއެވެ. އެކަމަނާ ވިދާޅުވި ގޮތުގައި، މިއަދު ދިވެހި ކޮންމެ ރައްޔިތެއްގެ އެންމެ އިސް ވާޖިބަކަށް ވާންޖެހޭނީ، މިނިވަންކަމަށްޓަކައި ކާބަފައިން ވެވަޑައިގެންނެވި ޤުރުބާނީގެ ޙަޤީޤަތްތައް އަންނަން އޮތް ޖީލުތަކަށް، ވަކިން ހާއްސަކޮށް ދަރިންގެ ހިތްތަކަށް ވާސިލްކޮށްދިނުމެވެ.
ހިތްތަކުގައި ޤައުމީ ލޯބީގެ ފަޚުރާއި ޝަރަފު އުތުރި އަރަމުންދާ، އުފާވެރި މިނިވަން ދުވަހުގެ މުނާސަބަތުގައި، އަޅުގަނޑުގެ އަޚުންނާއި އުޚުތުންނަށް ތަހުނިޔާއާއި ހެޔޮ އެދުންތައް އަރިސްކުރަމެވެ.
މިނިވަންކަމުގެ މަތިވެރި ނިއުމަތް އަޅުގަނޑުމެންނަށް ލިބިފައި މިވަނީ މާޒީގައި ކާބަފައިން… pic.twitter.com/22RaTZLhqU— First Lady Sajidha Mohamed (@sajidhaamohamed) July 26, 2026
މީގެ އިތުރުން، މިނިވަންކަން ދެމެހެއްޓުމަށްޓަކައި ކުރިމަތިވާ ކޮންމެ ހުރަހެއް ފަހަނަޅައި ދިއުމުގެ ހިތްވަރާއި ޖޯޝު ހުރި ޤައުމީ ލޯތްބެއް ޒުވާނުންގެ ހިތްތަކުގައި އަށަގެންނެވުމުގެ މުހިންމުކަން އެކަމަނާ ފާހަގަކުރެއްވިއެވެ. އަދި އިލްމާއި އަޚްލާޤުން ތަރުބިއްޔަތުވެފައިވާ، ޤައުމަށް ވަފާތެރި ޖީލެއް ބިނާކުރުމަށް ގޮވާލައްވަމުން، އެ މަސައްކަތުގައި މާތްﷲ ބަރަކާތްލައްވައި ކާމިޔާބީ ދެއްވުމަށް އެދި އެކަމަނާ ދުޢާކުރެއްވިއެވެ.
