އިދިކޮޅު އެމްޑީޕީން ރާއްޖޭގެ ވެރިކަމަށް އައި ކޮންމެ ފަހަރަކު ފެނިގެން ގޮސްފައިވަނީ އިސްލާމީ ގައުމުތަކާ ދުރު އަދި އިޒްރޭލަށް ފަހި ހާރިޖީ ސިޔާސަތެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ސޯޝަލް ސެންޓަރުގައި މިއަދު ބޭއްވި މިނިވަން ދުވަހުގެ ރަސްމީ ޖަލްސާގައި ރައީސް މުއިއްޒު ފާހަގަކުރެއްވި ގޮތުގައި، ކުރީގެ ސަރުކާރުތަކުން ފެނިގެން ދިޔައީ ދިވެހި ރައްޔިތުންގެ ވިސްނުމާއި ސަގާފަތާ މުޅިން ހިލާފު، އަދި އިސްލާމީ އުއްމަތާ ގުޅުން ކުޑަ ހާރިޖީ ސިޔާސަތުތަކެއް ތަންފީޒު ކުރަމުން ދިޔަ މަންޒަރެވެ.
”މީގެ ކުރީގައި އެމްޑީޕީގެ ވެރިކަން މިތާނގައި ހިނގި ކޮންމެ ފަހަރެއްގައި އޮތީ އޭގެ ދިމާ އިނދިކޮޅު. މި ހަގީގަތް ފެންނަން އޮތް. ޕްރޯ އިޒްރޭލު ފޮރިން ޕޮޮލިސީއެއް މިތާ ތަންފީޒު ކުރި. އަރަބި އިސްލާމީ ގައުމުތަކާ ދުރުވެގަތީ. މީކީ ދިވެހިންނަށް ދޯޅު ގޮތެއް ނޫން – ރައީސް
އެ މަނިކުފާނު ވިދާޅުވި ގޮތުގައި، އެ ސިޔާސަތުތަކުގެ ސަބަބުން އަރަބި އަދި އިސްލާމީ ގައުމުތަކާ އޮތް ގުޅުން ހީނަރުވެ، ދިވެހިންގެ އަގީދާއާ ބީރައްޓެހި ހާލަތަކަށް ކަންކަން ގޮސްފައިވެއެވެ.
މި ސަރުކާރުގެ ހާރިޖީ ސިޔާސަތަކީ ގައުމީ މަސްލަހަތު ހިމާޔަތްކުރުމަށް އިސްކަންދޭ ”މޯލްޑިވްސް ފަސްޓް“ ސިޔާސަތެއްކަން ފާހަގަކުރައްވައި ރައީސް ވިދާޅުވީ، ރާއްޖޭގެ ކޮންމެ ހާރިޖީ ގުޅުމެއް ބިނާވާނީ ދިވެހިންގެ ދީނީ އަގީދާއާއި ގައުމީ ހަމަތަކުގެ މައްޗަށް ކަމަށެވެ. އަދި މިހާރުގެ ސަރުކާރުން އަބަދުވެސް މަސައްކަތްކުރަމުން ގެންދަނީ އިސްލާމީ ގައުމުތަކާއި ދުނިޔޭގެ އެކި ގައުމުތަކާއެކު ސުލްހަވެރި އަދި ބަދަހި ގުޅުމެއް ގާއިމުކުރުމަށް ކަމަށް އެމަނިކުފާނު ވިދާޅުވިއެވެ.
ރާއްޖެއަކީ އަބަދުވެސް ސުލްހައަށް ލޯބިކުރާ ގައުމެއްކަން ފާހަގަކުރައްވައި ރައީސް މުއިއްޒު ވަނީ، ގައުމުގެ މިނިވަންކަމާއި ސިޔާދަތު ދެމެހެއްޓުމުގައި ސަރުކާރުން ދޫނުދޭނެކަމުގެ ޔަގީންކަން ދެއްވާފައެވެ. ރާއްޖޭގެ ހާރިޖީ ސިޔާސަތު ހަރުދަނާކޮށް، ދިވެހިންގެ އަގީދާއާއި ގަބޫލުކުރާ އުސޫލުތައް ހިމާޔަތްކުރުމަކީ މި ސަރުކާރުގެ އެންމެ މުހިންމު އެއް އަމާޒުކަން ރައީސް ތަކުރާރުކުރެއްވިއެވެ.
