ހުޅުމާލެ ފޭސް 1 ގައި ހުންނަ އެޕޯލޯ ކްރިސްޓަލް ބިލްޑިންގގެ އެޕާޓްމަންޓަކުން ދުން އަރަމުންދާ ކަމުގެ ރިޕޯޓް ލިބިގެން، ފުލުހުންނާއި އާންމުން ގުޅިގެން އެތަނުގައި ރޯވި އަލިފާން ނިއްވާލައިފިއެވެ.
ފުލުހުން ބުނީ މި ހާދިސާގެ މައުލޫމާތު ފުލުހުންނަށް ލިބިފައިވަނީ 2026 ޖުލައި 25 ވަނަ ދުވަހުގެ މެންދުރުފަހު 13:57 އެހައިކަންހާއިރު ކަމަށެވެ. ރިޕޯޓް ލިބުމާއެކު ފުލުހުން އެ ސަރަހައްދަށް ގޮސް ބެލިބެލުމުން، ދުން އަރަމުންދަނީ އެ އިމާރާތުގެ 8 ވަނަ ފަންގިފިލާގައި ހުރި އެޕާޓްމަންޓަކުންކަން ކަށަވަރުވެފައިވާ ކަމަށް ފުލުހުން ބުނެއެވެ.
އެ ވަގުތު އެޕާޓްމަންޓުގައި އެއްވެސް މީހަކު ނެތުމުން، ފުލުހުންނާއި އެ ސަރަހައްދުގައި ތިބި އާންމުންގެ އެހީތެރިކަމާއެކު އެޕާޓްމަންޓުގެ ދޮރު ހަލާކުކޮށްލައިގެން އެތެރެއަށް ވަދެ، ރޯވެފައި ހުރި އަލިފާން ވަނީ ކޮންޓްރޯލްކޮށްފައެވެ. ފުލުހުން މައުލޫމާތު ދޭ ގޮތުގައި، މި ހާދިސާގައި އަލިފާން ރޯވެފައިވަނީ އެޕާޓްމަންޓުގެ ބެލްކަނީގައި ބަހައްޓާފައި ހުރި ލަކުޑި ތަކެއްގައެވެ.
މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާއިރު، އަލިފާން ރޯވާން މެދުވެރިވި ސަބަބު ދެނެގަތުމަށްޓަކައި ފުލުހުން މިހާރު ދަނީ މި މައްސަލަ އިތުރަށް ތަހުގީގު ކުރަމުންނެވެ.
