މާލޭގެ ރާޅުގަނޑު ސަރަޙައްދުގައި ބައިނަލްއަޤުވާމީ ފެންވަރުގެ ސާފިންގ ސްޓޭޑިއަމެއް އެޅުމުގެ މަސައްކަތް ސަރުކާރުން ބާރުމިނުގައި ކުރިއަށްގެންދަވާކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ހާމަކުރައްވައިފިއެވެ. ރައީސް މިކަން ހާމަކުރެއްވީ ”ދަ ޕަލްސް“ ޕްރޮގްރާމްގެ 5 ވަނަ އެޕިސޯޑުގައި ”އެކި އެމްވީ“ އަށް ދެއްވި އިންޓަވިއުގައެވެ.
މި މަޝްރޫޢާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ރާޅުގަނޑު ސަރަޙައްދުގައި ތަރައްޤީކުރާ މި ސްޓޭޑިއަމަކީ ރާއްޖޭގެ ރާޅާ އެޅުންތެރިންނަށް ބައިނަލްއަޤުވާމީ މުބާރާތްތަކަށް ތައްޔާރުވުމަށާއި، ރާއްޖޭގައި ބޮޑެތި މުބާރާތްތައް ބޭއްވުމަށް މަގުފަހިވެގެންދާނެ ފެންވަރު ރަނގަޅު ވަސީލަތަކަށް ވެގެންދާނެ ކަމަށެވެ.
”ރާޅުގަނޑު ސަރަޙައްދުގައި އިންޓަނޭޝަނަލް ފެންވަރުގެ ސާފިންގ ސްޓޭޑިއަމެއް އެޅުމުގެ މަސައްކަތް އެދަނީ ކުރެވެމުން.. ރައީސް ވިދާޅުވިއެވެ.
މީގެ އިތުރުން، ރާއްޖޭގައި މިހާތަނަށް ގާއިމުކުރެވިފައި ނެތް އިންޑޯ ބޯލިންގ އެރީނާއެއް ތަރައްޤީކުރުމުގެ މަސައްކަތްވެސް ކުރިއަށްދާކަން ރައީސް ފާހަގަކުރެއްވިއެވެ. މި އެރީނާ ބިނާކުރުމަށް ހަމަޖެހިފައިވަނީ ހުޅުމާލެ ފޭސް 1 ގައެވެ. މި މަޝްރޫޢަށް ބޭނުންވާ ބިން މިހާރު ވަނީ ހަވާލުކުރެވިފައި ކަމަށާއި، ކޮންޓްރެކްޓަރަށް ބޭނުންވާ ފައިސާވެސް މިހާރު ދޫކުރެވިފައިވާ ކަމަށް ރައީސް ވިދާޅުވިއެވެ.
ޒުވާނުންނަށް ހުރި އެކިކަހަލަ ކުޅިވަރު ކުޅުމާއި މުނިފޫހިފިލުވުމުގެ ފުރުޞަތުތައް އިތުރުކުރުމަށް ސަރުކާރުން ގެންގުޅުއްވާ ތަޞައްވުރުގެ ދަށުން ގިނަ މަޝްރޫޢުތަކެއް ރޭވިފައިވާކަން ރައީސް ފާހަގަކުރެއްވިއެވެ. މިގޮތުން، ޒުވާނުންގެ ހުނަރުތައް ކުރިއަރުވައި، ދުޅަހެޔޮ މުޖުތަމަޢެއް ބިނާކުރުމަށްޓަކައި ބޭނުންވާ ޒަމާނީ ވަސީލަތްތައް ރާއްޖޭގެ އެކި ކަންކޮޅުތަކުގައި ޤާއިމުކުރުމަކީ ސަރުކާރުގެ މުހިންމު އަމާޒެއް ކަމަށް ރައީސުލްޖުމްހޫރިއްޔާ ވިދާޅުވިއެވެ.
