މާލެ ސަރަޙައްދުގެ ތޮއްޖެހުން ކުޑަކޮށް، ޒުވާނުންނަށް ބޭނުންވާ މުނިފޫހިފިލުވުމާއި އިޖުތިމާޢީ ޙަރަކާތްތަކަށް ޚާއްޞަ ބޮޑު ޝޮޕިންގ މޯލެއް ބިނާކުރުމުގެ މަސައްކަތް ސަރުކާރުން ފަށާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރައްވައިފިއެވެ.
ރައީސުލްޖުމްހޫރިއްޔާ މިކަން ހާމަކުރެއްވީ ”ދަ ޕަލްސް“ ޕްރޮގްރާމްގެ 5 ވަނަ އެޕިސޯޑުގައި ’އެކިއެމްވީ‘ ގެ ނޫސްވެރިއާ ކުރި ސުވާލަކަށް ޖަވާބު ދެއްވަމުންނެވެ. ނޫސްވެރިޔާ ވަނީ މާލެ ސަރަޙައްދުގައި ޒުވާނުންނަށް ޙަރަކާތްތެރިވެވޭނެ ފުރުޞަތުތައް މަދުކަން ފާހަގަކޮށް، ގޭމިންގ ސެންޓަރުތަކާއި ސިނަމާތައް ހިމެނޭ ފަދަ ބޮޑު ޝޮޕިންގ މޯލެއް ރާއްޖެއަށް މުހިންމު ކަމަށް ޒުވާނުން ދެކޭތީ، އެކަމާ މެދު ރައީސްގެ ވިސްނުންފުޅަކީ ކޮބައިތޯ ސުވާލު ދަންނަވާފައެވެ.
މި ސުވާލަށް ޖަވާބު ދެއްވަމުން ރައީސް މުޢިއްޒު ވިދާޅުވީ، އެއީ ހަމައެކަނި ވިސްނުންފުޅެއް ނޫން ކަމަށާއި، އެފަދަ މަޝްރޫޢުތަކުގެ ޢަމަލީ މަސައްކަތްތައް މިހާރު ފެށިގެން ކުރިއަށްދާ ކަމަށެވެ. އަދި މި ދައުރުގެ ތެރޭގައި އެ މަސައްކަތްތައް ނިމި، ރައްޔިތުންނަށް އޭގެ ފައިދާ ފެންނަން ފަށާނެ ކަމުގެ ޔަޤީންކަން ރައީސް ދެއްވިއެވެ.
މީގެއިތުރުން، މުޅި ރާއްޖެއަށް އަމާޒުކޮށްގެން ކުރިއަށްގެންދާ އިތުރު މަޝްރޫޢުތަކުގެ ތަފްޞީލު ދެއްވަމުން ރައީސް ވިދާޅުވީ، ރާއްޖޭގެ ކޮންމެ ރަށެއްގައިވެސް އެންމެ ޒަމާނީ ފެންވަރުގެ ފިޓްނަސް ރިކްރިއޭޝަން މަރުކަޒުތައް ޤާއިމުކުރުމުގެ މަސައްކަތް ކުރިއަށްދާ ކަމަށެވެ.
”މިއަހަރު ނިމޭއިރު ދެބައިކުޅަ އެއްބައި ރަށުގައި މިފަދަ މަރުކަޒުތައް ނިމިފައި ހުންނާނެ ކަމަށް ބެލެވޭ. އަދި އަންނަ އަހަރަށް ހުރިހާ ރަށެއްގެ މަސައްކަތް ނިންމާލެވޭނެ،“ ރައީސް ވިދާޅުވިއެވެ.
މީގެ އިތުރުން، އާބާދީ ބޮޑެތި ރަށްރަށާއި ހުޅުމާލެ އަދި ވިލިމާލެ ހިމެނޭހެން އިންޑޯ ސްޕޯޓްސް ކޮމްޕްލެކްސްތަކެއް ބިނާކުރުމަށް ނިންމާފައިވާކަންވެސް އެމަނިކުފާނު ފާހަގަކުރެއްވިއެވެ. އަދި ހުރިހާ ރަށެއްގައި އައުޓްޑޯ ޖިމްތައް ޤާއިމުކުރުމުގެ މަސައްކަތްވެސް ބާރުމިނުގައި ކުރިއަށްދާ ކަމަށް ވިދާޅުވިއެވެ.
ރައީސް މުޢިއްޒު އިތުރަށް ވިދާޅުވީ، މި ހުރިހާ މަޝްރޫޢުތަކެއްގެ މައިގަނޑު މަޤްޞަދަކީ ދުޅަހެޔޮ ސިއްހީ އާދަތަކަށް މަގުފަހިކޮށްދީ، ވަށާޖެހޭ ސިއްހީގޮތުން ދުޅަހެޔޮ އަދި ހަށިހެޔޮ މުޖްތަމަޢުއެއް ބިނާކުރުން ކަމަށެވެ. މި މަޝްރޫޢުތަކުގެ ސަބަބުން ޒުވާނުންނަށް ބޭނުންވާ އިޖުތިމާޢީ އަދި ކުޅިވަރުގެ ފުރުޞަތުތައް އިތުރުވެގެންދާނެ ކަމަށް ސަރުކާރުން ދެކެއެވެ.
