ދިވެހި މުޖުތަމައުގައި ބުލީކުރުމުގެ މައްސަލަތައް އިތުރުވަމުންދާތީ، އެކަން ހުއްޓުވުމަށްޓަކައި ހަރުދަނާ ޤާނޫނީ ފިޔަވަޅުތަކެއް އެޅުމުގެ ގޮތުން ”އެންޓި-ބުލީން“ ޤާނޫނެއް އެކުލަވާލުމުގެ މަސައްކަތް ސަރުކާރުން ފަށާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރައްވައިފިއެވެ.
ރައީސުލްޖުމްހޫރިއްޔާ މިކަން ހާމަކުރެއްވީ ”ޕަލްސް ޕޮޑްކާސްޓް“ ސީރީޒްގެ 5 ވަނަ އެޕިސޯޑުގައި ވާހަކަފުޅު ދައްކަވަމުންނެވެ.
އެމަނިކުފާނު ވިދާޅުވި ގޮތުގައި ބުލީކުރުމާ ދެކޮޅަށް ހަރުދަނާ ފިޔަވަޅުތަކެއް އެޅުމަށް ކުރެވެންހުރި ހުރިހާ މަސައްކަތެއް ސަރުކާރުން ދަނީ ކުރަމުންނެވެ. މި ޤާނޫނު އެކުލަވާލުމުގެ މަސައްކަތް ކުރިއަށްދަނީ މި ދާއިރާގެ ފަންނީ މީހުންނާއި ސްޓޭކް ހޯލްޑަރުންގެ ފުޅާ މަޝްވަރާގެ މަތިންކަން ރައީސް ފާހަގަކުރެއްވިއެވެ.
ބުލީގެ މައްސަލަތައް ހައްލުކުރުމަށް މުޅި މުޖުތަމައުގެ އެހީތެރިކަން ބޭނުންވާކަން ފާހަގަކުރެއްވައި ރައީސް މުޢިއްޒު ވިދާޅުވީ، ވަށާޖެހޭ ޞިއްޙީ ދުޅަހެޔޮކަން ޤާއިމްކޮށް، ނަފްސާނީ ގޮތުން ބޭނުންވާ އެހީތެރިކަން ފޯރުކޮށްދިނުމަށް ސަރުކާރުން ޚާއްޞަ އިސްކަމެއް ދޭ ކަމަށެވެ. މިގޮތުން، ނޭޝަނަލް މެންޓަލް ހެލްތު ހެލްޕްލައިނަކީ އާންމުންނަށް އިތުބާރު ކުރެވޭ ފަދަ ނިޒާމަކަށް ހެދުމަށް މެދުނުކެނޑި މަސައްކަތް ކުރަމުންދާ ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން، ނަފްސާނީ ބަލިތަކަށް ބޭނުންވާ ފަރުވާގެ އިންތިޒާމުތައް އާސަންދަ މެދުވެރިކޮށް ހަމަޖެހިފައި އޮތުމަކީ މިފަދަ ހާލަތްތައް ތަހައްމަލު ކުރާ ފަރާތްތަކަށް ލިބުނު ބޮޑު ލުޔެއްގެ ގޮތުގައި ރައީސް ފާހަގަކުރެއްވިއެވެ. ސަރުކާރުން މިހާރު ދަނީ ހޮސްޕިޓަލުތަކުން ލިބޭ ނަފްސާނީ ފަރުވާގެ ޚިދުމަތްތައް ފުޅާކުރުމަށާއި، އައު މެންޓަލް ހެލްތު ފެސިލިޓީއެއް ގާއިމްކުރުމުގެ މަސައްކަތް ކުރަމުންނެވެ.
އަލަށް އެކުލަވާލާ އެންޓި-ބުލީން ޤާނޫނުގެ ދަށުން، ބުލީކުރުމާ ގުޅޭ މަޢުލޫމާތުތައް ޚާއްޞަ ނިޒާމެއްގެ ތެރެއިން ސެންޓްރަލް އެޖެންސީއަކަށް ރިޕޯޓްކުރެވޭނެ އިންތިޒާމު ހަމަޖެހިގެންދާނެއެވެ. އަދި ސްކޫލުތަކުގެ ރަސްމީ މަންހަޖުގައި ބުލީއާ ގުޅޭ ތަފްސީލީ މަޢުލޫމާތު ހިމެނުމަށްވެސް ސަރުކާރުން ވަނީ ނިންމާފައެވެ.
މި ޤާނޫނު އެކުލަވާލުމުގެ މަސައްކަތް އެޓާނީ ޖެނެރަލްގެ އޮފީހުން ކުރަމުންދާކަން ރައީސުލްޖުމްހޫރިއްޔާ އެންމެ ފުރަތަމަ ހާމަކުރެއްވީ މިދިޔަ އޭޕްރީލް މަހުގެ ފަހުކޮޅު ބޭއްވި ނޫސްވެރިންގެ ބައްދަލުވުމެއްގައެވެ. މި މަސައްކަތްތަކުގެ ނަތީޖާ ރަނގަޅުވާނެ ކަމުގެ ފުރިހަމަ ޔަޤީންކަން ރައީސް މުޢިއްޒު ވަނީ ދެއްވާފައެވެ.
