ރާއްޖޭގެ 61 ވަނަ މިނިވަން ދުވަހުގެ މުނާސަބަތު ކުލަގަދަކޮށް ފާހަގަކުރުމުގެ ގޮތުން ”ސައްބީސް ކާނިވަލް“ ގެ ނަމުގައި ޚާއްސަ ހަރަކާތްތަކެއް ހުޅުމާލޭގައި ފަށައިފިއެވެ.
އޮފިޝަން އިވެންޓްސް އާއި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގުޅިގެން ބާއްވާ މި ކާނިވަލް ކުރިއަށްދަނީ ހުޅުމާލެ ސެންޓްރަލް ޕާކުގައެވެ. ޖުލައި 24 ވަނަ ދުވަހުން 31 ވަނަ ދުވަހުގެ ނިޔަލަށް ކުރިއަށްދާ މި ކާނިވަލް ހުޅުވިފައި ހުންނާނީ ކޮންމެ ދުވަހެއްގެ ހަވީރު 04:00 އިން ރޭގަނޑު 11:00 އަށެވެ.
8 ދުވަހުގެ މުއްދަތަށް ކުރިއަށްދާ މި ކާނިވަލަކީ ކުދިބޮޑު ހުރިހާ އުމުރުފުރާއަކަށް ބައިވެރިވެވޭ ގޮތަށް ފަރުމާކޮށްފައިވާ ކާނިވަލެކެވެ. ކާނިވަލްގެ ތެރޭގައި ތަފާތު ގޭމްތަކާއި، ޑިޖިޓަލް ގޭމިންގ އެރީނާ، ކުޑަކުދިންނަށް ޚާއްސަ އޭރިއާ އަދި އިންފްލޭޓަބަލްސްގެ އިތުރުން ތަފާތު ބާވަތްތަކުގެ ކާބޯތަކެތި ލިބޭނެ ފުޑް ކިއޮސްކުތައް ވަނީ ގާއިމުކޮށްފައެވެ.
ކާނިވަލްގެ ފުރަތަމަ ދުވަހު ޒިޔާރަތްކުރި ގިނަ ބައެއްގެ ސަމާލުކަން އެންމެ ބޮޑަށް ހުއްޓިފައިވަނީ މި އިވެންޓުގައި ހިމެނޭ ”ހޮރޯ ހައުސް“ ނުވަތަ ބިރުވެރި ހޮހަޅައަށެވެ. ކާނިވަލަށް ޒިޔާރަތްކުރި ގިނަ ކުދިން ބުނި ގޮތުގައި އެންމެ މަޖާވެފައި ބިރުވެރި ތަޖުރިބާއެއް ކުރެވުނީ ހޮރޯ ހައުސްގެ ތެރެއިންނެވެ.
އެޗްޑީސީން މައުލޫމާތު ދޭ ގޮތުގައި މި ކާނިވަލް ބޭއްވުމުގެ މައިގަނޑު މަޤުސަދަކީ މިނިވަން ދުވަހުގެ އުފާވެރިކަން ރައްޔިތުންނަށް ފޯރުކޮށްދިނުމާއެކު، ހުޅުމާލޭގައި ދިރިއުޅޭ ރައްޔިތުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމެވެ. އަދި އާއިލާތަކާއެކު ހިތްހަމަޖެހޭ ވަގުތުކޮޅެއް ހޭދަކުރުމުގެ ފުރުސަތު ހޯދައިދިނުމަކީވެސް މި ހަރަކާތުގެ ބޭނުމެކެވެ.
އެޗްޑީސީން ބުނީ އަމާޒަކީ ކުރިއަށް އޮތް ތަނުގައިވެސް ގައުމީ މިފަދަ މުނާސަބަތުތަކާ ގުޅުވައިގެން ރައްޔިތުންނަށް ބައިވެރިވެވޭނެ ތަފާތު ހަރަކާތްތައް ހުޅުމާލޭގައި ކުރިއަށް ގެންދިއުން ކަމަށެވެ.
