މާލޭ ސިޓީގެ ބޮޑުތަކުރުފާނު މަގަށް ގެނެވުނު ތަރައްގީއަކީ މާލޭގައި ދިރިއުޅޭ ރައްޔިތުންނަށާއި މާލެއަށް ޒިޔާރަތްކުރާ ފަރާތްތަކުގެ އިތުރުން، މާލޭގެ ޓްރެފިކް ތޮއްޖެހުމުގެ މައްސަލައަށް ލިބިގެންދާނެ ވަރަށް ބޮޑު ލުޔެއްކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ބޮޑުތަކުރުފާނު މަގުގެ އާބާތުރަ ފިލުވައި، ތާރު އަޅައިގެން ތަރައްގީކުރުމުގެ މަޝްރޫއު ނިންމައި މަގު ހުޅުވައިލުމާ ގުޅިގެން ނައިބު ރައީސް ވިދާޅުވީ، މިއީ މާލޭ ސިޓީގެ މަގުތަކަށް ތާރީޚީ ބަދަލެއް ގެނުވި މުހިއްމު މަޝްރޫއެއް ކަމަށެވެ. އަދި މި މަޝްރޫއުގެ ސަބަބުން ދަތުރުފަތުރުގެ ނިޒާމަށް ބޮޑެތި ފަސޭހަތަކެއް ލިބިގެންދާނެކަން އެމަނިކުފާނު ފާހަގަކުރެއްވިއެވެ.
މާލޭ ސިޓީގެ ބޮނޑެތަކުރުފާނު މަގަޓެ ގެނާޑެ ތަރައްގީ އައްކޫ މާލެ ސިޓީއަޓެ ލަފައި، ހުރަނެ ފަރާތްތަކާއި މާލޭ ސިޓީގެ ޓްރެފިކަޓެ ބޮނޑެ ލޫލެ ތަކެކެ ލެބީގެން އެޔަނެ ތަރައްގީއެކެ. މީބޫ މާލޭ ސިޓީގެ މަގު މައްތަޓެ ތާރީޚީ ބަދަލެކެ ގެނާޑެ މުހިއްމު މަޝްރޫއެކެ. ރައްޔިތުނެ ބޭނުންވެގޮހޯ ތެއި… pic.twitter.com/Oduotj0iGr
— Hussain Mohamed Latheef (@HucenSembe) July 24, 2026
ރައްޔިތުން ބޭނުންވާ ފަދަ މުހިއްމު ތަރައްގީގެ މަޝްރޫއުތަކާއެކު ގައުމު ބިނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ އިސްކަމާއި އަހައްމިއްޔަތުކަމަށްޓަކައި ނައިބު ރައީސް ވަނީ އެމަނިކުފާނަށް ޝުކުރު އަދާކުރައްވާފައެވެ.
”އިގުތިޞާދީ ގޮތުން ގޮންޖެހުންތަކެއް ހުރި ނަމަވެސް، ސަރުކާރުން ރައްޔިތުންގެ ބޭނުންތައް ފުއްދައިދިނުމަށް ކުރަމުންދާ މިފަދަ މަސައްކަތްތަކަކީ މި ސަރުކާރުން ކުރަމުންދަނީ ހެޔޮވެރިކަމެއްކަމުގެ އަލިގަދަ ހެއްކެއް،“ ނައިބު ރައީސް ވިދާޅުވިއެވެ.
މާލޭގެ އެންމެ ބާރުބޮޑު އެއް މަގު ކަމަށްވާ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކޮށް ހުޅުވައިލުމަކީ، މާލޭގެ މަގުތައް ރަނގަޅު ފެންވަރަކަށް ހެދުމަށް ސަރުކާރުން ފަށާފައިވާ ބޮޑު މަޝްރޫއުގެ މުހިއްމު ބައެކެވެ. މީގެ ސަބަބުން ހިނގާބިނގާވެ އުޅޭ މީހުންނަށާއި އުޅަނދުފަހަރު ދުއްވާ ފަރާތްތަކަށް ރައްކާތެރި އަދި އޮމާން ދަތުރުފަތުރެއްގެ މާހައުލެއް ގާއިމުވެގެންދާނެއެވެ.
