އެމެރިކާއާއި އީރާނާ ދެމެދު ހިނގަމުންދާ ވަރުގަދަ ހަނގުރާމައިގެ ތެރެއަށް ރަޝިޔާއާއި ޗައިނާއިން ވަދެ، އީރާނަށް ހަތިޔާރާއި ސެޓެލައިޓް މައުލޫމާތު ދިނުމާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް ވަރުގަދަ އިންޒާރެއް ދީފިއެވެ.
ރައީސް ޓްރަމްޕް ބުނީ، ޗައިނާގެ ރައީސް ޝީ ޖިންޕިންގ އާއި ރަޝިޔާގެ ރައީސް ވލަޑިމިއަރ ޕޫޓިން އީރާނަށް ހަތިޔާރު ނުވިއްކާނެ ކަމުގެ ޔަޤީންކަން އެމެރިކާއަށް ދީފައިވާކަމަށެވެ. ނަމަވެސް، އެއްވެސް ޤައުމަކުން އީރާނަށް ހަތިޔާރާއި، ސެޓެލައިޓް މެދުވެރިކޮށް ޙަމަލާދޭނެ ސައިޓްތަކުގެ މަޢުލޫމާތު (ޓާގެޓިންގ ޓެލެމެޓްރީ) ފޯރުކޮށްދީފިނަމަ، އެއީ އެމެރިކާއާ ދެކޮޅަށް ކުރެވޭ އަމަލެއްގެ ގޮތުގައި ބެލެވޭނެ ކަމަށާއި، ”އެއީ އެޤައުމުތަކަށް ވަރަށް ނިކަމެތި ނަތީޖާއެއް ކުރިމަތިވާނެ ކަމެއް“ ކަމަށް ޓްރަމްޕް ބުންޏެވެ.
އެމެރިކާއިން އެންމެ ބޮޑަށް ކަންބޮޑުވަނީ ރަޝިޔާއާއި ޗައިނާގެ ސެޓެލައިޓް ނެޓްވޯކްތައް ބޭނުންކޮށްގެން އީރާނުން އެމެރިކާގެ އަސްކަރީ ބޭސްތަކަށް ޙަމަލާދީފާނެތީއެވެ. އެހެން ޤައުމުތަކުން އީރާނަށް އަސްކަރީ އެހީތެރިކަން ފޯރުކޮށްދިނުން މަނާކުރަމުން އެމެރިކާއިން އިންޒާރުދޭއިރު، އެމެރިކާއިން ދަނީ ރަޝިޔާއާއި ޗައިނާއާ ދެކޮޅަށް ޔޫކްރެއިނާއި ޓައިވާނަށް ބިލިއަނުން ޑޮލަރުގެ ހަތިޔާރާއި ސެޓެލައިޓް އިންޓެލިޖެންސް ފޯރުކޮށްދެމުންނެވެ. ރަޝިޔާއާއި ޗައިނާއިން ސިފަކުރާ ގޮތުގައި މިއީ އެމެރިކާގެ އަމިއްލަ އެދުމުން ފުރިގެންވާ ދެފުށްދެގޮތް މުނާފިޤު ސިޔާސަތެކެވެ.
