ސަރުކާރުގެ ސިޔާސަތުތަކުގެ ތެރެއިން އެންމެ މައި އިސްކަމެއް ދެވޭ އެއް ދާއިރާއަކީ ޒުވާނުން ތަރައްޤީކޮށް، އެކަނބަލުންނާއި އެކަލުން ބާރުވެރިކުރުވުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ”ދަ ޕަލްސް“ ޕްރޮގްރާމްގެ 5 ވަނަ އެޕިސޯޑުގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ޤައުމުގެ އިޤްތިޞާދު ބިނާކުރުމުގައި ސަރުކާރުން އެންމެ މުހިންމު ފަރާތެއްގެ ގޮތުގައި ބަލަނީ ޒުވާނުން ކަމަށެވެ. އެގޮތުން ޒުވާނުން ބާރުވެރިކުރުވުމަށްޓަކައި އެކި ކަހަލަ ޕްރޮގްރާމްތަކާއި މަޝްރޫޢުތައް ސަރުކާރުން މިހާރުވެސް ކުރިއަށް ގެންދާކަން އެމަނިކުފާނު ފާހަގަކުރެއްވިއެވެ.
ޒުވާނުންނަށް އިޤްތިޞާދީ ގޮތުން ފަހި ފުރުޞަތުތަކެއް ހޯދައިދިނުމަށްޓަކައި އެކި ކަހަލަ ސްކީމްތައް ތަޢާރަފްކޮށް ހިންގުމާއި، ތަޢުލީމީ ދާއިރާއިން މަތީ ތަޢުލީމުގެ ފުރުޞަތުތައް ފަހިކޮށްދިނުމަކީ ސަރުކާރުގެ އަމާޒެކެވެ. މީގެ އިތުރުން، ކިޔަވާ ނިމުމަށްފަހު ވަޒީފާގެ ފުރުޞަތުތައް ހޯދައިދިނުމާއި، އަމިއްލަ ފައިމައްޗަށް ތެދުވެ އާމްދަނީ ހޯދޭނެ މަގުތައް ފަހިކޮށްދިނުމަށް ސަރުކާރުން ޚާއްޞަ އިސްކަމެއް ދޭނެ ކަމަށް ރައީސް ވިދާޅުވިއެވެ.
”އަޅުގަނޑުމެންގެ ސިޔާސަތުގެ ތެރެއިން ވަރަށް މުހިންމު ދާއިރާއެއް ޒުވާނުން ތަރައްޤީ ކުރުމުގެ ދާއިރާ އަކީ.. އެންމެ މައި އިސްކަމެއް ދެވޭ ދާއިރާއެއްގެ ގޮތުގައި ބެލެވޭ ދާއިރާއެއް. ޒުވާނުންނަކީ ޤައުމުގެ އިޤްތިޞާދު ބިނާކުރުމުގަ ސަރުކާރުގެ އެންމެ މުހިންމު އެއްފަރާތް“ ރައީސް ވިދާޅުވިއެވެ.
”ކްރިއޭޓިވް އިކޮނޮމީ“ ނުވަތަ އުފެއްދުންތެރި އިޤްތިޞާދެއްގެ ހަޤީޤީ ސިފަ ރާއްޖޭގެ އިޤްތިޞާދުގެ ތެރެއިން ޖެއްސުމަކީ މި ސަރުކާރުގެ މުހިންމު އަމާޒެކެވެ. ރައީސް ވިދާޅުވި ގޮތުގައި، ސަރުކާރުގެ އަމާޒަކީ 2030 ވަނަ އަހަރު އަންނަންވާއިރަށް ރާއްޖޭގެ ޖީޑީޕީގެ މަދުވެގެން 15 އިންސައްތަ އަކީ ކްރިއޭޓިވް އިކޮނޮމީގެ ދާއިރާއިން ހިއްސާކުރާ މިންވަރަކަށް ހެދުމެވެ.
”ކްރިއޭޓިވް އިކޮނޮމީއެއްގެ ހަޤީޤީ ސިފަ ރާއްޖޭގެ އިގްތިޞާދުގެ ތެރެއިން ޖައްސުވައިދީ އެ ފަހު ފުރުސަތު ގާއިމްކޮށްދީ އޭގެ ނަތީޖާއެއްގެ ގޮތުން، ރާއްޖޭގެ އިގްތިޞާދުގަ ޖީޑީޕީއަށް 15 އިންސައްތައަށްވުރެ މަދުނޫން އަދަދެއް 2030 ވަނަ އަހަރު އަންނަންވާއިރަށް ކޮންޓްރިބިއުޓްކުރާ ދާއިރާއަކަށް ކްރިއޭޓިވް އިކޮނޮމީ ހެދުމުގެ އަމާޒު ހާސިލުކުރުމާ މިކަހަލަ ވަރަށް ގިނަ ކަންކަން ހިމެނޭ ހަގީގަތުގަ“ ރައީސް ވިދާޅުވިއެވެ.
ތަޢުލީމީ ނިޒާމުގެ ތެރެއިން ކުރިއަށްދާނެ މަގުތައް ނުފެންނަ ޒުވާނުންނަށްވެސް އެކި ކަހަލަ ފުރުޞަތުތައް ހޯދައިދިނުމަށް ސަރުކާރުން ވަނީ ރާވާފައެވެ. އެގޮތުން ”ނޭޝަނަލް ސާވިސް ޕްރޮގްރާމް“ މެދުވެރިކޮށް ޒުވާނުންނަށް މަގުކޮށައިދިނުމުގެ މަސައްކަތް ކުރިއަށްދާނެ ކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލެއްވީ، ޒުވާނުންނަށް ބޭނުންވާ ބޯހިޔާވަހިކަމުގެ ފުރުޞަތުތަކާއެކު، ވަށާޖެހޭ ސިޔާސަތެއްގެ ދަށުން ޒުވާނުންނަށް އުޖާލާ މުސްތަޤްބަލެއް ހޯދައިދިނުމަށް ސަރުކާރުން ސާބިތުކަމާއެކު މަސައްކަތް ކުރާނެ ކަމުގެ ޔަޤީންކަން ދެއްވަމުންނެވެ.
