މުޖުތަމަޢުގެ އެއްބައިވަންތަކަމާއި ވަޙުދަތު ރައްކާތެރިކޮށް ދެމެހެއްޓުމަކީ ކޮންމެ މުސްލިމެއްގެ ދީނީ އަދި ޤައުމީ ވާޖިބެއްކަމަށާއި، މަސްއޫލިއްޔަތު އަދާކުރުމުގައި ޒިންމާދާރުވުމަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ.
ރާއްޖޭގެ އެކިކަންކޮޅުތަކުގައި މިއަދު އިއްވި ހުކުރު ޚުޠުބާ ބިނާކޮށްފައިވަނީ ”މަސްޢޫލިއްޔަތު އަދާ ކުރުމުގައި ޒިންމާދާރުވުން“ މި މައުޟޫޢުގެ މައްޗަށެވެ.
ޚުޠުބާގައި ފާހަގަކުރެއްވި ގޮތުގައި، މުޖުތަމަޢުގެ ކޮންމެ ފަރުދަކީވެސް ބެލެހެއްޓުންތެރިއެކެވެ. ރަސޫލުﷲ ﷺ ގެ ޙަދީޘްފުޅަކާ ޙަވާލާދީ ޚުޠުބާގައި ވިދާޅުވީ، ވެރިމީހާއާއި، ފިރިމީހާއާއި، އަނބިމީހާ އަދި ޚާދިމުންނަކީވެސް އެމީހެއްގެ ބެލެހެއްޓުމުގެ ދަށުގައިވާ ކަންކަމާ މެދު ޤިޔާމަތް ދުވަހުން ސުވާލުވެވޭނެ ބައެއް ކަމަށެވެ. މީގެ އިތުރުން، އެކި ފެންވަރުގެ މަސްއޫލިއްޔަތުތަކާ ޙަވާލުވެތިބި މީހުން، އެމީހުންގެ ޢަހުދުތަކާއި ހުވާތަކަށް ޙުރުމަތްތެރިކޮށް ހިތުމަކީ ކޮންމެހެން ކުރަންޖެހޭނެ ކަމެއްކަން ޚުޠުބާގައި ހަނދާންކޮށްދެއްވިއެވެ.
”އަހަރެމެންގެ ތެރެއިން ހަމަ ކޮންމެ މީހަކީ، އެ މީހަކު މި ދުނިޔޭގައި ކުރި ކަންތައްތަކާ މެދު ސުވާލުކުރެވޭނޭ މީހެކެވެ. އޭނާގެ ޢަމަލުތަކާ މެދު މާތް ﷲ ގެ ޙަޟުރަތުގައި ޖަވާބުދާރީވާން ޖެހޭނޭ މީހެކެވެ،“ ޚުޠުބާގައި ވިދާޅުވިއެވެ.
އިސްލާމީ މުޖުތަމަޢުގެ ތަރައްޤީއާއި އެއްބައިވަންތަކަން ބިނާވެގެންވަނީ ޢަދުލުއިންޞާފުގެ މައްޗަށްކަން ބަޔާންކުރައްވަމުން، ޢަދުލުއިންޞާފުގެ ކުރިމަތީގައި އެންމެންނަކީ ހަމަހަމަ ބައެއްކަން ޚުޠުބާގައި ފާހަގަކުރެއްވިއެވެ. މިގޮތުން، ކީރިތި ރަސޫލާ ﷺ ގެ ދަރިކަނބަލުން ފާޠިމަތުގެފާނު ވައްކަމެއް ކުރެއްވި ކަމުގައި ވިޔަސް، އިސްލާމީ ޝަރީޢަތް ތަންފީޛު ކުރައްވާނެ ކަމަށް އެކަލޭގެފާނު ޙަދީޘްކުރެއްވި ބަސްފުޅުން މިސާލު ދެއްވިއެވެ.
މީގެ އިތުރުން، ވަޒީފާއާއި މަސްއޫލިއްޔަތަކީ އަމާނާތެއް ކަމަށާއި، ރައްޔިތުން ޙަވާލުކޮށްފައިވާ އެންމެހައި ކަންކަމުގައި ތެދުވެރިވެ، އިޚުލާޞްތެރިވުމަށް ޚުޠުބާގައި ނަޞޭޙަތްތެރިވިއެވެ. ފުރިހަމަ މުސްލިމަކީ އަމިއްލަ ފައިދާއަށްވުރެ މުޖުތަމަޢުގެ މަޞްލަޙަތަށް އިސްކަންދޭ މީހާ ކަމުގައިވެސް ޚުޠުބާގައި ބަޔާންކުރެއްވިއެވެ.
ޚުޠުބާ ނިންމަވާލައްވަމުން، ޤައުމުގެ ވަޙުދަތު ދެމެހެއްޓުމަށްޓަކައި ދެކޮޅުވެރިކަމާއި އަރައިރުންތަކުން ދުރުހެލިވުމަށާއި، ﷲ އަށާއި އެކަލާނގެ ރަސޫލާއަށް އަދި އަމާނާތްތަކަށް ޚިޔާނާތްތެރިނުވުމަށް އެންމެހައި ދިވެހި މުސްލިމުންނަށް އިލްތިމާސްކުރެއްވިއެވެ.
