ސަރުކާރުން ކުރިއަށްގެންދާ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) މަޝްރޫޢުތަކަށް މިއަހަރުގެ މިހާތަނަށް 3.2 ބިލިޔަން ރުފިޔާ ޚަރަދުކޮށްފައިވާ ކަމަށް މާލީ ވުޒާރާއިން ހާމަކޮށްފިއެވެ.
މާލީ ވުޒާރާއިން އެންމެ ފަހުން އާންމުކުރި ”ވީކްލީ ފިސްކަލް ޑިވެލޮޕްމަންޓް“ ރިޕޯޓުގައިވާ ގޮތުން، މި މަހުގެ 16 ވަނަ ދުވަހުގެ ނިޔަލަށް ޕީއެސްއައިޕީއަށް 3.2 ބިލިޔަން ރުފިޔާ ޚަރަދުކޮށްފައިވާއިރު، މިއީ މިދިޔަ އަހަރުގެ މި މުއްދަތުގައި ޚަރަދުކުރި 3.8 ބިލިޔަން ރުފިޔާއާ އަޅާބަލާއިރު 15.7 އިންސައްތައިގެ ދަށްވުމެކެވެ. މާލީ ވުޒާރާއިން ބުނިގޮތުގައި ޚަރަދުތައް ދަށްވެފައިވަނީ މަޝްރޫޢުތައް ހިންގުމުގެ ޚަރަދުތައް ހަރުދަނާކޮށް ބަލަހައްޓަމުން ގެންދާތީއެވެ.
ވަކިވަކި ދާއިރާތަކަށް ބަލާއިރު، އެންމެ ބޮޑު ހޭދައެއްކޮށްފައިވަނީ ބޯހިޔާވަހިކަމުގެ ދާއިރާއަށެވެ. މި ދާއިރާއަށް މިއަހަރު 480 މިލިޔަން ރުފިޔާ ޚަރަދުކޮށްފައިވާއިރު، މިއީ މިދިޔަ އަހަރުގެ މި މުއްދަތުގައި ޚަރަދުކުރި 215 މިލިޔަން ރުފިޔާއާ އަޅާބަލާއިރު 123 އިންސައްތައިގެ ބޮޑު އިތުރުވުމެކެވެ. މި ޚަރަދުތައް މައިގަނޑު ގޮތެއްގައި އަމާޒުކޮށްފައިވަނީ ސަރުކާރުން ހިންގާ ގެދޮރުވެރިކަމުގެ މަޝްރޫޢުތަކަށެވެ.
މީގެ އިތުރުން ދަތުރުފަތުރުގެ ދާއިރާއަށްވެސް ބޮޑު ހޭދައެއް ކޮށްފައިވާކަން މާލީ ވުޒާރާގެ ތަފާސްހިސާބުތަކުން ދައްކައެވެ. އެގޮތުން ދަތުރުފަތުރުގެ ވަސީލަތްތައް ޤާއިމްކުރުމަށް 997.6 މިލިޔަން ރުފިޔާ ވަނީ ޚަރަދުކޮށްފައެވެ. މީގެ އިތުރުން ދައުލަތުގެ އާންމު ޚިދުމަތްތަކަށް 576.9 މިލިޔަން ރުފިޔާ އަދި ޞިއްޙީ ދާއިރާ ކުރިއެރުވުމަށް 206.1 މިލިޔަން ރުފިޔާ ވަނީ ހޭދަކޮށްފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ މަޝްރޫޢުތައް ހިންގުމުގައި ފައިދާއާއި ބޭނުންތެރިކަމަށް ބަލާނެކަން ހާމަކޮށްފައެވެ. މިގޮތުން، އަލަށް ފަށާ މަޝްރޫޢުތަކުގެ ފަންނީ ދިރާސާތައް ހެދުމަށް ”ޕްރޮޖެކްޓް ޕްރިޕަރޭޓަރީ ފަންޑެއް“ ޤާއިމްކޮށް، އެކަމަށް ބަޖެޓުގައި ވަނީ ފައިސާ ހިމަނާފައެވެ. މިއަހަރުގެ ބަޖެޓުގައި ޕީއެސްއައިޕީ މަޝްރޫޢުތަކަށް ޖުމްލަ 8.3 ބިލިޔަން ރުފިޔާ ޚަރަދުވާނެ ކަމަށް ލަފާކޮށްފައިވެއެވެ.
