ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އެތެރޭގެ ބޮޑު އިންތިޚާބަށްފަހު، އެ ޕާޓީގެ ސްޓިއަރިން ކޮމެޓީތައް އަލުން އެކުލަވާލައި ރަސްމީކޮށް އިޢުލާންކޮށްފިއެވެ. ރާއްޖޭގެ އެންމެ މެންބަރުން ގިނަ ސިޔާސީ ޕާޓީގެ ގޮތުގައި އޮތް ޕީއެންސީން މިހާރު ތައްޔާރުވަމުންދަނީ ކުރިއަށް އޮތް ސެޕްޓެމްބަރު މަހު ބޭއްވުމަށް ހަމަޖެހިފައިވާ އެ ޕާޓީގެ މަތީ މަޖިލީހަށެވެ.
2,500 އަށް ވުރެ ގިނަ މަޤާމުތަކަށް މެންބަރުން އިންތިޚާބުކުރި މި ފޯރިގަދަ އިންތިޚާބަކީ ޕާޓީގެ ކުރިމަގަށް އެޅުނު ވަރަށް ހެޔޮ ފާލެއްގެ ގޮތުގައި ޕީއެންސީން ސިފަކުރެއެވެ. މާލެއާއެކު ރާއްޖޭގެ 119 ރަށެއްގައި ބޭއްވި މި އިންތިޚާބުގައި ވޯޓުލުމުގެ ޙައްޤު ލިބިފައިވާ މީހުންގެ 85 އިންސައްތަ މީހުން ވޯޓުލާފައިވާކަން އެ ޕާޓީން ފާހަގަކުރެއެވެ.
ޕީއެންސީގެ އެތެރޭގެ އިންތިޚާބާ ގުޅޭގޮތުން ވާހަކަދައްކަވަމުން، އެ ޕާޓީގެ ޗެއަރޕާސަން އަދި ރައްޔިތުންގެ މަޖިލީހުގެ ރައީސް ޢަބްދުއްރަހީމް ޢަބްދުﷲ ވިދާޅުވީ، މި އިންތިޚާބުން ފެނިގެންދިޔައީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތުތަކަށް ރައްޔިތުންގެ މެދުގައި އޮތް ބޮޑު ތާއީދާއި އިތުބާރު ކަމަށެވެ. ޚާއްޞަކޮށް 2,000 އަށްވުރެ ގިނަ މެންބަރުން މަޤާމުތަކަށް ވާދަކުރުމަކީ ޕާޓީގެ އެތެރޭގެ ޑިމޮކްރަސީ ވަރުގަދަވެފައިވާ މިންވަރު ހާމަކޮށްދޭ ކަމެއް ކަމަށް އޭނާ ފާހަގަކުރެއްވިއެވެ.
ޕީއެންސީން ބުނާ ގޮތުގައި، މި އިންތިޚާބުގައި ގިނަ އަދަދެއްގެ ޒުވާނުން އިންތިޚާބީ މަޤާމުތަކަށް ހޮވިފައިވުމަކީ ޕާޓީގެ ހިންގުމަށް ލިބުނު އާ ހިތްވަރެކެވެ. މިއީ ކުރިއަށް އޮތް ރިޔާސީ އިންތިޚާބަށް ޕާޓީގެ ޓީމުތައް ރާވާލުމުގެ ފެށުން ކަމަށް ވެސް އެޕާޓީން ޤަބޫލުކުރެއެވެ.
މިހާރު ޕީއެންސީން އެންމެ އިސްކަމެއް ދީގެން ކުރަމުންދާ މަސައްކަތަކީ އަންނަ ސެޕްޓެމްބަރު މަހުގެ 15 އިން 18 އަށް ބޭއްވުމަށް ތައްޔާރުވަމުންދާ ”މަތީ މަޖިލިސް“ ބޭއްވުމުގެ އިދާރީ އިންތިޒާމްތަކެވެ. އަލަށް އިންތިޚާބުވި ދާއިރާތަކުގެ ރައީސުންނާއި މެންބަރުންނާއެކު ބާއްވާ މި މަޖިލީހުގައި، ޕާޓީގެ ކުރިމަގާ ގުޅޭ މުހިންމު ނިންމުންތަކެއް ނިންމުމަށް ވަނީ ހަމަޖެހިފައެވެ.
ޕީއެންސީ އަކީ މިހާރު ރާއްޖޭގައި އޮތް އެންމެ ބޮޑު ސިޔާސީ ޕާޓީއެވެ. އިލެކްޝަންސް ކޮމިޝަނުގެ ތަފާސްހިސާބުތަކުން ދައްކާ ގޮތުގައި މިއަހަރުގެ ފެށުނުއިރު އެ ޕާޓީގެ ދަފްތަރުގައި 74,048 މެންބަރުން ތިއްބެވެ.
އެޕާޓީގެ އަމާޒަކީ މިހާރު އެކުލަވާލެވުނު އާ އޮނިގަނޑާއެކު، ސަރުކާރުގެ ސިޔާސަތުތައް ތަންފީޛުކުރުމުގައާއި ސިޔާސީ މައިދާނުގައި ޕާޓީ އިތުރަށް ވަރުގަދަކުރުން ކަމަށް ބުނެއެވެ.
