ހުޅުމާލެ ހޮސްޕިޓަލުން ފޯރުކޮށްދޭ ޞިއްޙީ ޚިދުމަތްތަކުގެ ފެންވަރު މަތިކޮށް، މުޅިން އައު ޚިދުމަތްތަކެއް މިއަހަރުގެ މިނިވަން ދުވަހުގެ ކުރިން ފެށުމަށް ތައްޔާރުވެއްޖެއެވެ.
މިކަމާ ގުޅޭގޮތުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤު ޙަލީމް ވިދާޅުވީ، ހުޅުމާލެ ހޮސްޕިޓަލުގެ ޚިދުމަތްތައް ހަރުދަނާކުރުމަށް ސަރުކާރުން ކުރަމުންދާ މަސައްކަތުގެ ދަށުން ޖުލައި 26ގެ ކުރިން މުހިންމު ޚިދުމަތްތަކެއް ތައާރަފްކުރެވޭނެ ކަމަށެވެ.
މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ހުޅުމާލެ ހޮސްޕިޓަލުގައި އައު ޚިދުމަތްތަކެއް ފައްޓަވާނެކަން އިޢުލާނުކުރައްވާފައެވެ. އެގޮތުން އަލަށް ފެށުމަށް ހަމަޖެހިފައިވާ ޚިދުމަތްތަކުގެ ތެރޭގައި ގޮހޮރާއި މައިދާގެ ބަލިތަކަށް ޚާއްސަ އޯޕީޑީއާއި، ޔޫރޮލޮޖީ އަދި އީއީޖީގެ ޚިދުމަތް ހިމެނެއެވެ. މީގެ އިތުރުން ނާރުގެ ބަލިތަކަށް ޚާއްސަ ކްލިނިކަކާއި، ގްލޮކޯމާ ފަރުވާގެ ޚިދުމަތްވެސް ފެށުމަށް ވަނީ ހަމަޖެހިފައެވެ.
ސީއީއޯ ޙަލީމް ވިދާޅުވި ގޮތުގައި މި ޚިދުމަތްތަކުގެ ސަބަބުން ހުޅުމާލޭގައި ދިރިއުޅޭ ރައްޔިތުންނަށް ވަރަށް ބޮޑު ލުޔެއް ލިބިގެންދާނެއެވެ.
”މިހާރު ގޮހޮރާ މައިދާގެ ޚާއްސަ ޑޮކްޓަރަކަށް ދައްކަންވެއްޖެއްޔާ ހުޅުމާލޭގައި ދިރިއުޅޭ ފަރާތްތަކުން ވަޑައިގަންނަވާނީ އައިޖީއެމްއެޗަށް. އެކަމަކު ހުޅުމާލޭގައި ދިރިއުޅޭ ފަރާތްތަކަށް ޚާއްސަކޮށްގެން ހުޅުމާލެ ހޮސްޕިޓަލުގައި އެ ޚިދުމަތް ފަށާނަން،“ އޭނާ ވިދާޅުވިއެވެ.
މީގެ އިތުރުން، ލޭގެ ސިއްޙީ ރައްކާތެރިކަން ކަށަވަރުކުރުމަށް ހަދާ ”ގޯލްޑް ސްޓޭންޑާޑް“ ޓެސްޓުތައްވެސް ފެށުމަށް ވަނީ ހަމަޖެހިފައެވެ. މީގެ ސަބަބުން އެޗްއައިވީ ފަދަ ބަލިތަކުގެ ނަތީޖާ ކުރިއަށްވުރެ އަވަހަށް ލިބިގެންދާނެ ކަމަށާއި، ހޮސްޕިޓަލުން ފޯރުކޮށްދޭ ކެންސަރު ބަލީގެ ފަރުވާވެސް އިތުރަށް ހަރުދަނާކުރެވޭނެ ކަމަށް ސީއީއޯ ފާހަގަކުރެއްވިއެވެ.
2026 ވަނަ އަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ވިދާޅުވެފައިވާ ލަނޑުދަނޑިތަކާ އެއްގޮތަށް، ސަރުކާރުން ޞިއްޙީ ދާއިރާއަށް ގެންނަން ބޭނުންވާ ކުރިއެރުންތައް އެގޮތުގައި ގެނެސްދިނުމަކީ މާލެ ސިޓީ ގްރޫޕް އޮފް ހޮސްޕިޓަލްސްއިން ނުހަނު ފަޚުރުވެރިވާ ކަމެއް.
އެގޮތުން ހުޅުމާލޭގައި… pic.twitter.com/HWAzCIBwH1
— Haleem (@22halex) July 22, 2026
ހުޅުމާލެ ހޮސްޕިޓަލަށް ދިމާވެފައިވާ ޖާގައިގެ ދަތިކަން ހައްލުކުރުމަށް ވޭތުވެދިޔަ ދެ އަހަރުގެ ތެރޭގައި ގިނަ މަސައްކަތްތަކެއް ވަނީ ކުރެވިފައެވެ. އޭގެ ތެރޭގައި ޒަމާނީ 4 އޮޕަރޭޓިންގ ރޫމް ހިމެނޭ ތިއޭޓަރ ކޮމްޕްލެކްސްއަކާއި، 10 އެނދުގެ އައިސީޔޫއެއްގެ އިތުރުން، 14 އެނދުގެ ނިއޮނޭޓަލް އައިސީޔޫއެއް (NICU) ވަނީ ތަރައްޤީކޮށްފައެވެ. އަދި ހޮސްޕިޓަލުގެ އީއާރު އެނދުގެ އަދަދު 7 އިން 14 އަށް އިތުރުކޮށް، ޑައިލިސިސް ޚިދުމަތްވެސް ވަނީ ފުޅާކޮށްފައެވެ.
