ރާއްޖޭގައި ފެތުރެމުންދާ ހިމަބިހި (މީސަލްސް) ޖެހިގެން ރިޕޯޓްކުރާ މީހުންގެ އަދަދު މަދުވާން ފަށާފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، ނިމިދިޔަ ހަފުތާގައި ރާއްޖެއިން ހިމަބިހި ޖެހިގެން ރިޕޯޓްކޮށްފައިވަނީ 22 މީހުންނެވެ. މިއީ އޭގެ ކުރީ ހަފުތާއާ އަޅާބަލާއިރު ދަށް އަދަދެކެވެ. ކުރީ ހަފުތާގައި މި ބަލި ޖެހިގެން 23 މީހަކު ރިޕޯޓްކޮށްފައިވެއެވެ.
މި ފަހުން ރާއްޖެއިން ހިމަބިހީގެ ކޭސްތަކެއް ފެންނަން ފެށި ފަހުން، މިހާތަނަށް މި ބަލި ޖެހުނު މީހުންގެ ޖުމްލަ އަދަދު ވަނީ 166 އަށް އަރާފައެވެ. ބަލި ފެތުރުން ކޮންޓްރޯލް ކުރުމަށްޓަކައި ސަރުކާރުން އަންނަނީ ހަރުދަނާ ފިޔަވަޅުތަކެއް އަޅަމުންނެވެ.
ވޭތުވެދިޔަ ހަފްތާގައި ހިމަބިހި (މީސްލްސް) ކޭސްތަކުގެ އަދާހަމަ
#measles pic.twitter.com/GHBrSi5DSZ
— Health Protection Agency (@HPA_MV) July 21, 2026
ބަލިން ރައްކާތެރިވުމުގެ ގޮތުން އެޗްޕީއޭއިން ކުރިއަށްގެންދާ ވެކްސިން ޖެހުމުގެ ކެމްޕޭނުގެ ދަށުން، މިހާތަނަށް 9,918 މީހުންނަށް ވެކްސިން ދީފައިވާ ކަމަށް އެ އިދާރާއިން މައުލޫމާތުދެއެވެ. މީގެ ތެރޭގައި ވެކްސިން ފުރިހަމަކޮށްފައިވާކަން ކަށަވަރުނުވާ ފަރާތްތަކާއި، ބަލި ޖެހުނު މީހުންނާ ގާތުން ބައްދަލުވި ފަރާތްތައް ހިމެނެއެވެ.
ރާއްޖެއަކީ ހިމަބިހި ނައްތާލެވިފައިވާ ގައުމަކަށް ވީނަމަވެސް، ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) ގެ މިންގަނޑުތަކާ އެއްގޮތަށް، ބަލީގެ ކޭސްއެއް ފެންނައިރަށް ދަނީ ސިއްހީ ކުއްލި ފިޔަވަޅުތައް އަޅަމުންނެވެ. މިގޮތުން ބަލި ޖެހޭ މީހުން ދެނެގަތުމާއި، ކޮންޓެކްޓް ޓްރޭސިން ހެދުމުގެ އިތުރުން އާންމުން ހޭލުންތެރިކުރުމުގެ މަސައްކަތްތައް ހަލުވިކަމާއެކު ކުރިއަށްދެއެވެ.
އެޗްޕީއޭއިން އިލްތިމާސްކުރަނީ ހުން އައުމާއެކު ގައިގައި ރަތް ބިހި ނެގުން، ކެއްސުން، އަދި ލޯ ރަތްވުން ފަދަ އަލާމާތެއް ފެނިއްޖެނަމަ، ލަސްނުކޮށް ސިއްހީ އެހީތެރިކަން ހޯދުމަށެވެ. އަދި ބަލި ފެތުރުން ހުއްޓުވުމަށްޓަކައި ވެކްސިން ފުރިހަމަކުރުމަކީ އެންމެ މުހިންމު ފިޔަވަޅުކަމަށް އެ އެޖެންސީން ފާހަގަކުރެއެވެ.
