އިސްލާމީ ކަންތައްތަކާ ބެހޭ ވުޒާރާއިން ކުރިއަށްގެންދާ މަޝްރޫޢުތަކުގެ ތެރެއިން 16 މިސްކިތަކާއި، ކީރިތި ޤުރްއާނާ ބެހޭ މަރުކަޒުގެ ދެ ގޮތްޕެއްގެ މަސައްކަތް ކުރިއަށް އޮތް ރަމަޟާން މަހުގެ ކުރިން ނިންމަވާލައްވާނެ ކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އިސްލާމިކް މިނިސްޓްރީގެ މީޑިއާ ގްރޫޕަށް ފޮނުއްވި މެސެޖެއްގައި މިނިސްޓަރ ޝަހީމް ވިދާޅުވީ، އިސްލާމީ ދާއިރާ ކުރިއެރުވުމަށް ކުރިއަށްގެންދާ މަޝްރޫޢުތައް އަވަހަށް ނިންމުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްޞަ ސަމާލުކަމެއް ދެއްވަމުން ގެންދަވާ ކަމަށެވެ. އެގޮތުން އަންނަ ރޯދަމަސް ފެށުމުގެ ކުރިން ރާއްޖޭގެ އެކި ކަންކޮޅުތަކުގައި ބިނާކުރަމުންދާ 16 މިސްކިތެއްގެ މަސައްކަތް ނިންމައި، އާންމުންނަށް ނަމާދުކުރެވޭނެ އިންތިޒާމު ހަމަޖެހިގެންދާނެ ކަމަށް ވިދާޅުވިއެވެ.
މީގެ އިތުރުން ހުޅުމާލޭގައި ކުރިއަށްދާ މަޝްރޫޢުތަކާ ގުޅޭގޮތުން މިނިސްޓަރ ވިދާޅުވީ، މިނިސްޓްރީއާއި އަމިއްލަ ފަރާތްތަކުން ގުޅިގެން ހުޅުމާލޭގައި ބިނާކުރަމުންދާ ދާއިމީ މިސްކިތްތައް މިއަހަރު ނިމުމުގެ ކުރިން ހުޅުވުމަށް ބާރުސްޕީޑުގައި މަސައްކަތް ކުރަމުންދާ ކަމަށެވެ.
”އަޅުގަނޑުމެންގެ އަމާޒަކީ މިއަހަރުގެ ނިޔަލަށް ހުޅުމާލޭގައި މިހާރު ހުރި ވަގުތީ މިސްކިތްތައް އުވާލައި، ދާއިމީ މިސްކިތްތަކުގައި ނަމާދުކުރަން ފެށުން،“ މިނިސްޓަރ ޝަހީމް ވިދާޅުވިއެވެ.
ސަރުކާރުގެ ވަޤުފު މަޝްރޫޢުތަކާ ގުޅޭގޮތުން މިނިސްޓަރ އިތުރަށް ވިދާޅުވީ، މިހާރު ފެށިފައިވާ ވަޤުފު މަޝްރޫޢުތަކުގެ ތެރެއިން ބައެއް މަޝްރޫޢުތައް އަންނަ އަހަރުގެ ފަހުކޮޅުގައި ނިމި، އޭގެ ނަފާ އިސްލާމީ ކަންކަމަށް ލިބެން ފަށާނެ ކަމަށެވެ.
މި މަޝްރޫޢުތަކަކީ ރައީސް ޑރ. މުޢިއްޒުގެ ސަރުކާރުން އިސްލާމީ ދާއިރާ ހަރުދަނާކޮށް، ދީނީ ވަޞީލަތްތައް ތަރައްޤީކުރުމަށް ގެންގުޅުއްވާ ހަރުދަނާ ސިޔާސަތުގެ ދަށުން ކުރިއަށްދާ މުހިންމު މަސައްކަތްތަކެކެވެ.
