ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ އެންމެ އިސްވެރިޔާ ނުވަތަ ޗީފް ޖުޑީޝަލް އެޑްމިނިސްޓްރޭޓަރގެ މަޤާމަށް ކުރިމަތިލުމަށް ހުޅުވާލި ފުރުޞަތުގައި، އެ މަޤާމަށް 10 ބޭފުޅަކު ކުރިމަތިލައްވައިފިއެވެ.
މި މަޤާމަށް ކުރިމަތިލުމުގެ ފުރުޞަތު ޖޭއެސްސީން ހުޅުވާލާފައިވަނީ މި ހިނގާ މަހުގެ 8 ވަނަ ދުވަހުއެވެ. މި މަޤާމު ހުސްވެފައިވަނީ ކުރިން އެ މަޤާމުގައި ހުންނެވި އަލްއުސްތާޛު އަމްޖަދު މުޞްޠަފާ މިދިޔަ އޭޕްރީލް މަހު އިސްތިއުފާ ދެއްވުމާ ގުޅިގެންނެވެ.
ޖޭއެސްސީން އާންމުކޮށްފައިވާ ލިސްޓުގައިވާ ގޮތުން މި މަޤާމަށް ކުރިމަތިލެއްވި ބޭފުޅުން
ހޫދު މުޙައްމަދު / ވަލުގެ، ގދ.މަޑަވެލި
އަޙްމަދު ރިފްޢަތު / ސީފިޔާގެ، ރ.މަޑުއްވަރީ
އާދަމް ޝަމީމު / މަލާޒް، ދ.މާއެނބޫދޫ
އާމިނަތު ނަޝްމީ ފަޟީލް / މ.ޒޭވަރު، މާލެ
ޢާއިޝަތު ޙިކްމާ / އަސްރަފީވިލާ، ސ.ހިތަދޫ
އިސްމާޢީލް ސާޖިދު / މއ.ވިލާރޮދި، މާލެ
މުޙައްމަދު ނިޔާޒް / ނައިޓްރޯސް، މ.ރަތްމަންދޫ
މަރްޔަމް ޝަހާނާ / މ.މެދުރިޔާ، މާލެ
މަރްޔަމް ނިހާޔަތު / މ.ތާޖް، މާލެ
ޝަފީޤާ ނަޢީމް / ބީޗްސައިޑް، ފ.ނިލަންދޫ
މި މަޤާމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުޠުތަކުގެ ތެރޭގައި، އިދާރީ ހިންގުމުން ނުވަތަ ޤާނޫނީ ދާއިރާއިން ފުރަތަމަ ޑިގްރީ ހާސިލްކޮށްފައިވުމާއެކު، އެ ދާއިރާތަކުން މަދުވެގެން 10 އަހަރުގެ ތަޖުރިބާ ލިބިފައިވުން ހިމެނެއެވެ. އަދި އުމުރުން 60 އަހަރުން ދަށުގެ މީހަކަށް ވާންޖެހޭއިރު، ސިޔާސީ އެއްވެސް މަޤާމެއް ފުރަމުންދާ ފަރާތަކަށް ނުވުމާއި ސިޔާސީ ޕާޓީއެއްގެ މެންބަރަކަށް ވެގެން ނުވާނެއެވެ. މީގެ އިތުރުން، ޖިނާއީ ބޮޑެތި ކުށްތަކާއި ބަދުއަޚްލާޤީ ކުށްތަކުން ބަރީއަވެފައިވާ ފަރާތަކަށް ވާންޖެހެއެވެ.
މި މަޤާމަކީ ބޮޑު މުސާރައަކާއި އިނާޔަތްތަކެއް ކަނޑައެޅިފައިވާ މަޤާމެކެވެ. އެގޮތުން އަސާސީ މުސާރައިގެ ގޮތުގައި 30,000 ރުފިޔާ، އެގްޒެކްޓިވް އެލަވެންސްގެ ގޮތުގައި 27,235 ރުފިޔާ އަދި ފޯނު އެލަވެންސްގެ ގޮތުގައި 2,000 ރުފިޔާ ލިބޭނެއެވެ.
ޖޭއެސްސީން މިހާރު ކުރިއަށް ގެންދަނީ ކުރިމަތިލެއްވި ބޭފުޅުންގެ ތެރެއިން އެންމެ އެކަށީގެންވާ ފަރާތެއް ހޮވުމުގެ މަސައްކަތެވެ. ޝަރުޠު ހަމަވާ ފަރާތްތަކާ އިންޓަވިއު ކުރުމުގެ މަރުޙަލާ ކުރިއަށް އޮތް ދުވަސްތަކުގައި ބޭއްވުމަށް ވަނީ ހަމަޖެހިފައެވެ.
