މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ ބިޔަ މަޝްރޫޢުގެ ދަށުން، ތިލަފުށީގައި އިންޓަނޭޝަނަލް އަދި ޑޮމެސްޓިކް ބަނދަރު ތަރައްޤީ ކުރުމުގެ މަސައްކަތް ޗައިނާ ހާބަރ އިންޖިނިއަރިން ކުންފުނި (ސީއެޗްއީސީ) އާ ހަވާލުކޮށްފިއެވެ.
މި މަސައްކަތް އެ ކުންފުންޏާ ހަވާލުކުރުމަށް ބޭއްވި ޚާއްސަ ރަސްމިއްޔާތު އޮތީ މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ހެޑް އޮފީހުގައެވެ. މި އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ ކެޕްޓަން ޙުސައިން ޝަފީޤް އެވެ. ޗައިނާ ހާބަރ އިންޖިނިއަރިން ކުންފުނީގެ ފަރާތުން ސޮއިކުރެއްވީ އެ ކުންފުނީގެ ކަންޓްރީ މެނޭޖަރު މާއޯ ބާއޯއެވެ.
މި އެއްބަސްވުމުގެ ދަށުން ބައިނަލްއަޤްވާމީ މުދާ އުފުލާ ކޮންޓޭނަރ ބޯޓުފަހަރަށް ޚާއްސަކޮށްގެން 14.6 މީޓަރު ފުންމިނުގެ އަދި 375 މީޓަރު ދިގު މަގަތުފާލަމެއް ތަރައްޤީ ކުރާނެއެވެ. މީގެ އިތުރުން، އެތެރޭގެ ދަތުރުފަތުރުތަކުގައި ބޭނުންކުރާ މުދާ އުފުލާ އުޅަނދުފަހަރަށް ޚާއްސަ 5 މީޓަރު ފުން، 820 މީޓަރު ދިގު ޑޮމެސްޓިކް ކީވޯލެއް ނުވަތަ މަގަތުފާލަމެއް ވެސް މި މަޝްރޫޢުގެ ދަށުން ބިނާކުރާނެއެވެ.
މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫޢުގެ ދަށުން އިންޓަރނޭޝަނަލް އަދި ޑޮމެސްޓިކް ކީ-ވޯލްގެ މަސައްކަތް ހަވާލުކުރުމުގެ އެއްބަސްވުމުގައި މޯލްޑިވްސް ޕޯޓްސް ލިމިޓަޑް އާއި ސީ.އެޗް.އީ.ސީ ސޮއިކޮއްފިއެވެ.
މި އެއްބަސްވުމުގެ ދަށުން ބައިނަލްއަޤްވާމީ މުދާ އުފުލާ ކޮންޓޭނަރ… pic.twitter.com/gZfkmmZ7di
— Maldives Ports Limited (@Portmv) July 20, 2026
އެމްޕީއެލްއިން ބުނި ގޮތުގައި މި މަޝްރޫޢުގެ މައިގަނޑު މަޤްޞަދަކީ ރާއްޖޭގެ ކަނޑުދަތުރުފަތުރާއި ލޮޖިސްޓިކްސް ދާއިރާއަށް އަންނަ ކުރިއެރުމާ އެއްވަރަށް ބަނދަރުގެ ވަޞީލަތްތައް ފުޅާކޮށް، ޚިދުމަތުގެ ފެންވަރު ރަނގަޅުކުރުމެވެ. ދުނިޔޭގެ ފެންވަރުގައި ބަނދަރު ހެދުމުގެ ޤާބިލްކަން ލިބިފައިވާ ސީއެޗްއީސީއާ މި މަސައްކަތް ހަވާލުކުރުމަކީ، މާލޭ ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ދާއިމީ ޙައްލެއް ހޯދުމަށް ކުރެވޭ މުހިއްމު މަސައްކަތެކެވެ.
މި މަޝްރޫޢުގެ ބައެއް މަސައްކަތްތައް، އެމްޓީސީސީއާ ވެސް ވަނީ ހަވާލުކޮށްފައެވެ. އެގޮތުން 100 މީޓަރުގެ ޑޮމެސްޓިކް ކީވޯލަކާއި 3 ހެކްޓަރުގެ ސަރަހައްދެއް ޕޭވްކުރުމުގެ މަސައްކަތް އެ ކުންފުނިން ދަނީ ކުރަމުންނެވެ. މުޅި މަޝްރޫޢު ނިމޭއިރު، ތިލަފުށީ ބަނދަރުގައި 1,000 މީޓަރަށްވުރެ ދިގު ބައިނަލްއަޤްވާމީ މަގަތުފާލަމަކާއި، 2,000 މީޓަރަށްވުރެ ދިގު ޑޮމެސްޓިކް ޓާމިނަލެއް ހުންނާނެއެވެ.
މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. މި މަޝްރޫޢު ނިމުމުން، މިހާރު މުދާ ކްލިއަރ ކުރުމަށް ހޭދަވާ 5 ދުވަސް 48 ގަޑިއިރަށް ކުރުވާނެ ކަމަށް ލަފާކުރެވެއެވެ. އަދި މިއީ ކުރިއަށް އޮތް 30 އަހަރަށް އަމާޒުކޮށްގެން ފަރުމާކުރާ ބަނދަރެކެވެ.
ސަރުކާރުން އަމާޒު ހިފާފައިވަނީ އަންނަ އަހަރުގެ ނޮވެމްބަރު މަހުގެ 11 ވަނަ ދުވަހަށް މި މަޝްރޫޢުގެ މަސައްކަތް އެއްކޮށް ނިންމާލުމަށެވެ. މި ބަނދަރު ތިލަފުއްޓަށް ބަދަލުވުމުން، މިހާރު ބޭނުންކުރާ މާފަންނު ބަނދަރުގެ ސަރަހައްދު ސަރުކާރުގެ އެހެނިހެން ބޭނުންތަކަށް ހުސްކުރެވޭނެއެވެ.
