މެދުއިރުމަތީގެ ހަނގުރާމައިގެ އަސަރު ގަލްފު ޤައުމުތަކަށް އިންތިހާއަށް ފޯރައި، އީރާނުގެ އަސްކަރިއްޔާއިން ކުވައިތުގައި ހުންނަ އެމެރިކާގެ ’ކޭމްޕް އާރިފްޖާން‘ ބޭހުގައިވާ ’ހައިމާސް‘ (HIMARS) މިސައިލް ނިޒާމުތަކަށް ސީދާ ޙަމަލާދީފިއެވެ. މީގެ އިތުރުން އީރާނުން ވަނީ ޖެހިޖެހިގެން 3 ވަނަ ދުވަހު ކުވައިތުގެ ކަރަންޓާއި ފެން އުފައްދާ މައި ކާރުޚާނާއަށް ބޮންއަޅައި ބޮޑެތި ގެއްލުންތަކެއް ދީފައެވެ.
އީރާނުގެ ރަސްމީ މީޑިއާއިން ކަށަވަރުކޮށްދިން ގޮތުގައި، އެމީހުންގެ އެއްގަމު ބާރުތަކުން ފޮނުވާލި ”ސަރފޭސް-ޓޫ-ސަރފޭސް“ މިސައިލްތައް ސީދާ އަމާޒުކުރީ ކުވައިތުގެ ދެކުނުގައިވާ އެމެރިކާގެ އަސްކަރީ ބޭހުގައި ހުރި، އީރާނަށް ޙަމަލާދޭން ތައްޔާރުކޮށްފައިވާ ހައިމާސް ރޮކެޓް ސިސްޓަމްތަކަށެވެ.
މީގެ އިތުރުން އީރާނުގެ ޑްރޯންތަކުން ކުވައިތުގެ ފެން ސާފުކުރާ މަރުކަޒަކަށް ދިން ޙަމަލާތަކުގައި ބޮޑު އަލިފާންގަނޑެއް ރޯވެ، ކަރަންޓު ގްރިޑް ސަލާމަތްކުރުމަށްޓަކައި ގިނަ ޓާބައިންތަކެއް ވަނީ ނިއްވާލަން ޖެހިފައެވެ.
ކުވައިތުގެ ބޯފެނުގެ 90 އިންސައްތައަކީ މިފަދަ ކާރުޚާނާތަކުން ސާފުކުރާ ފެން ކަމަށްވުމުން، ޖެހިޖެހިގެން 3 ދުވަހު ދިން ޙަމަލާތަކުގެ ސަބަބުން މުޅި ޤައުމު ފެނަށް ޖެހުމުގެ ބޮޑު ބިރުވެރިކަމެއް ވަނީ އުފެދިފައެވެ. ކުވައިތުގެ ސަރުކާރުން ވަނީ ކުއްލި ނުރައްކަލުގެ ޙާލަތު އިޢުލާނުކޮށް، އާންމުން ފެނާއި ކަރަންޓު އިޤްތިޞާދުކޮށްގެން ބޭނުންކުރުމަށް އިލްތިމާސްކޮށްފައެވެ.
