ފީފާ ވޯލްޑް ކަޕް 2026 ގެ ފައިނަލް މެޗުން ބަލިވުމާއެކު، އިދިކޮޅަށް ކުޅުނު ސްޕެއިންގެ ޓީމު މާ މޮޅު ކަމަށް އާޖެންޓީނާގެ ކެޕްޓަން ލިއޮނެލް މެސީ އެއްބަސްވެއްޖެއެވެ.
އެމެރިކާގެ ނިއު ޔޯކް ނިއު ޖާޒީ ސްޓޭޑިއަމްގައި ކުޅުނު މި ފޯރިގަދަ ފައިނަލް މެޗުން އާޖެންޓީނާ ބަލިވީ 1-0 ގެ ނަތީޖާއަކުންނެވެ. މި މެޗުން ބަލިވެ، އިތުރު ކާމިޔާބީއެއް ހޯދައިނުދެވުމުން މެސީ ދަނޑުމަތީގައި ހުރީ ވަރަށް ބޮޑަށް އަސަރުކޮށް ފެންކަޅިވެފައެވެ.
މި ނަތީޖާއާއެކު، 1962 ވަނަ އަހަރު ބްރެޒިލަށްފަހު ޖެހިޖެހިގެން ދެ ފަހަރު ވޯލްޑް ކަޕް ކާމިޔާބުކުރާ ފުރަތަމަ ޓީމަށް ވުމަށް އާޖެންޓީނާ ކުރި އުއްމީދުތައް ވަނީ ނިމުމަކަށް އައިސްފައެވެ. މެޗުގެ ފުރިހަމަ ވަގުތު ހަމަވެ، ކުޅެވުނު އިތުރު ވަގުތުގެ ދެވަނަ ހާފު ފެށިގެން އެންމެ 37 ސިކުންތުގެ ތެރޭގައި ފެރާން ޓޮރޭޒް ކާމިޔާބުކުރި ލަނޑާއެކު ސްޕެއިން ވަނީ އެ ޤައުމުގެ ދެވަނަ ވޯލްޑް ކަޕް ތަށި އުފުލާލާފައެވެ.
ސްޓޭޑިއަމްގައި ތިބި 80،663 ސަޕޯޓަރުންގެ ބޮޑު ބައެއް އެދެމުންދިޔައީ އުމުރުން 39 އަހަރުގެ މެސީ ދެވަނަ ފަހަރަށް ދުނިޔޭގެ ތަށި އުފުލާލުމަށެވެ. ނަމަވެސް ސްޕެއިންގެ ތަރިން ތަށި އުފުލާލައި އުފާފާޅުކުރަމުން ދިޔައިރު، މެސީއާއި އޭނާގެ ކުޅުންތެރިން ތިބީ މާޔޫސްކަމާއެކު އާޖެންޓީނާގެ ސަޕޯޓަރުންނާ ކުރިމަތިލައިގެންނެވެ.
މެޗަށްފަހު ވާހަކަދައްކަމުން މެސީ ބުނީ މިއީ ވަރަށް ހިތާމަވެރި ވަގުތެއް ކަމަށާއި، ނަމަވެސް އާޖެންޓީނާއިން ކުޅުނީ މުޅި ހިތާއި ރޫހުންކަން ގަބޫލުކުރާ ކަމަށެވެ.
”ތެދަށް ބުނާނަމަ އެ މީހުން (ސްޕެއިން) މާ މޮޅު. އަހަރުމެން ބަލި ގަބޫލުކުރަން. އެކަމަކު އޭގެ މާނައަކީ މިހާތަނަށް ކުރި މަސައްކަތް ހަނދާން ނައްތާލުމެއް ނޫން. ޓީމުގެ ކުޅުންތެރިންނަށާއި، ޤައުމުގެ ރައްޔިތުންނަށް ޝުކުރު އަދާކުރަން،“ މެސީ ބުންޏެވެ.
މުޅި މުބާރާތުގައިވެސް ސްޕެއިންގެ ފަރާތުން ފެނުނީ އާދަޔާޚިލާފު މޮޅު ކުޅުމެކެވެ. ފައިނަލް މެޗުގެ ތަފާސްހިސާބުތަކަށް ބަލާއިރު، ސްޕެއިނުން 20 ހަމަލާ އުފެއްދިއިރު، އާޖެންޓީނާއަށް އުފެއްދިފައިވަނީ އެންމެ ހަމަލާއެކެވެ.
ޔޫރަޕްގެ ފުޓްބޯޅަ ދޫކޮށް އެމެރިކާގެ މޭޖަރ ލީގު ސޮކަރ (އެމްއެލްއެސް) އަށް ބަދަލުވުމުން މެސީގެ ކެރިއަރު ނިމުނީ ކަމަށް ގިނަ ބަޔަކު ހީކުރި ނަމަވެސް، މި ފަހަރުގެ މުބާރާތުގައި 8 ލަނޑާއި 4 އެސިސްޓާއެކު އޭނާ ވަނީ މޮޅު ކުޅުމެއް ދައްކާފައެވެ. މެސީ މިހާތަނަށް ވޯލްޑް ކަޕް ތާރީޚުގައި ޖުމްލަ 21 ލަނޑު ކާމިޔާބުކޮށްފައިވާއިރު، ފްރާންސްގެ ކީލިއަން އެމްބާޕޭ ވަނީ 22 ލަނޑާއެކު އެ ރިކޯޑު މި މުބާރާތުގައި މުގުރާލާފައެވެ.
މެސީއަކީ ތިން ވޯލްޑް ކަޕް ފައިނަލްގައި ކުޅުނު ފުރަތަމަ ކުޅުންތެރިޔާގެ ޝަރަފު ހޯދި ކުޅުންތެރިޔާއެވެ. އަދި ބައިނަލްއަގުވާމީ މައިދާނުގައި 125 ލަނޑު ޖަހައިގެން އޭނާ ހުރީ ކްރިސްޓިއާނޯ ރޮނާލްޑޯއަށްފަހު އެންމެ ގިނަ ލަނޑު ޖެހި ކުޅުންތެރިޔާގެ މަގާމުގައެވެ. ގިނަ ފަރާތްތަކުން ގަބޫލުކުރާ ގޮތުގައި މި މުބާރާތުގެ ކުޅުމާއެކު، މެސީއަކީ ތާރީޚުދުށް އެންމެ މޮޅު ކުޅުންތެރިޔާކަން ވަނީ އިތުރަށް ސާބިތުވެފައެވެ.
މެޗު ނިމުމާއެކު ސްޕެއިންގެ ކުޅުންތެރިން މެސީގެ ގާތަށް ގޮސް އޭނާއަށް އިހުތިރާމް އަދާކޮށް ހިތްވަރު ދިނެވެ. މި ކާމިޔާބީއާއެކު ސްޕެއިން ވެފައިވަނީ އެއްވަގުތެއްގައި ދުނިޔޭގެ ފިރިހެން އަދި އަންހެން ވޯލްޑް ކަޕް ތަށި އޮތް ހަމައެކަނި ޤައުމަށެވެ. މެޗަށްފަހު މެޑެލް ހަވާލުކުރި ރަސްމިއްޔާތުގައި މެސީ ހިނިތުންވާން މަސައްކަތް ކުރި ނަމަވެސް، އޭނާ ދަނޑުން ފައިބައިގެން ދިޔައީ ފުން ހިތާމައާއި މާޔޫސްކަމާއެކު އިސްދަށަށް ޖަހައިގެން ހުރެއެވެ
