2026 ވަނަ އަހަރުގެ ވޯލްޑްކަޕް ފުޓްބޯޅަ މުބާރާތުގެ އެންމެ މޮޅު ގޯލްކީޕަރަކަށްދޭ ”ގޯލްޑަން ގްލޯވް“ އެވޯޑް ސްޕެއިންގެ އިތުބާރު ކީޕަރު އުނާއި ސިމޯން ކާމިޔާބުކޮށްފިއެވެ.
މި މުބާރާތުގައި އުމުރުން 29 އަހަރުގެ ސިމޯން ދެއްކި ތަފާތު މޮޅު ކުޅުމާއެކު އޭނާ ވަނީ ތާރީޚީ ރެކޯޑެއްވެސް ގާއިމުކޮށްފައެވެ. އެގޮތުން މިފަހަރުގެ މުބާރާތުގައި އޭނާ ވަނީ ޖުމްލަ ހަތް މެޗުގައި ބައިކޮޅަށް ލަނޑެއް ވަނަނުދީ ”ކްލީން ޝީޓް“ ހިފަހައްޓާފައެވެ. މިއީ މީގެ ކުރިން އެއް ވޯލްޑްކަޕެއްގައި ކީޕަރަކު ގާއިމުކޮށްފައިވާ ރެކޯޑަށްވުރެ ދެ މެޗު އިތުރު އަދަދެކެވެ.
މީގެ އިތުރުން، ސިމޯން ވަނީ އޭނާގެ ވޯލްޑްކަޕް ކެރިއަރުގައި ޖުމްލަ ނުވަ ކްލީން ޝީޓް ހަމަކޮށްފައެވެ. މިއާއެކު އޭނާ މިހާރު ވަނީ ވޯލްޑްކަޕްގެ ތާރީޚުގައި އެންމެ ގިނަ ކްލީން ޝީޓް ހޯދުމުގެ ރެކޯޑާ އެންމެ ފިޔަވަޅަކާ ގާތަށް ޖެހިލާފައެވެ. މި ރެކޯޑް މިހާރު އޮތީ ޖުމްލަ 10 ކްލީން ޝީޓާއެކު ފްރާންސްގެ ކުރީގެ ކީޕަރު ފަބިއަން ބާތޭޒް އާއި އިންގްލެންޑްގެ ކުރީގެ ކީޕަރު ޕީޓަރ ޝިލްޓަން އަތުގައެވެ.
Most clean sheets in a World Cup – 7 🇪🇸
Unai Simon wins the Golden Glove 🧤
— Guinness World Records (@GWR) July 19, 2026
މި އެވޯޑާއެކު އުނާއި ސިމޯން ވެގެން ގޮސްފައިވަނީ ސްޕެއިންގެ ފުޓްބޯޅަ ތާރީޚުގައިވެސް ފާހަގަކޮށްލެވޭ ފަދަ ކާމިޔާބީއެއް ހޯދި ކީޕަރަކަށެވެ. މުބާރާތުގެ އެކި މަރުހަލާތަކުގައި އޭނާ ދެއްކި ހުށިޔާރުކަމަކީ ސްޕެއިންގެ ކުރިއެރުމުގައި މުހިންމު ދައުރެއް އަދާކުރި ކަމެކެވެ.
