ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ޚާއްޞަ އިސްނެންގެވުމުގެ މަތިން ކުރިއަށްގެންދާ ”އިޙްތިރާމް އަދާކުރުމުގެ ޤައުމީ މަޝްރޫޢު“ ފެށުމަށް ބޭނުންވާ މުހިންމު ޚިޔާލުތައް ހޯދުމުގެ މަސައްކަތް ރަސްމީކޮށް ފަށައިފިއެވެ.
މި މަޝްރޫޢާ ގުޅޭގޮތުން މަޝްވަރާކޮށް ޚިޔާލު ބަދަލުކުރުމަށް ބޭއްވި ޚާއްޞަ ވޯކްޝޮޕް ފައްޓަވައިދެއްވީ މިނިސްޓަރ ފޮރ ދިވެހި ލެންގުއޭޖް، ކަލްޗަރ އެންޑް ހެރިޓޭޖް ހީނާ ވަލީދުއެވެ. މި ބައްދަލުވުމަކީ ފަންނާއި ސަގާފަތާއި ތަރިކައާ ބެހޭ ވުޒާރާގެ ދިވެހި ޤައުމިއްޔަތުގެ އިސްވަރުގެ އޮފީހުން އިންތިޒާމުކޮށްގެން ކުރިއަށްގެންދިޔަ ބައްދަލުވުމެކެވެ.
މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ހީނާ ވަލީދު ވިދާޅުވީ، މިއީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަރަށް ބޮޑު އިސްކަމެއް ދެއްވައިގެން ފަށްޓަވާ މަޝްރޫޢެއް ކަމަށެވެ. އަދި މި މަޝްރޫޢު އެންމެ ފުރިހަމަ ގޮތުގައި ކުރިއަށް ގެންދިއުމަށްޓަކައި ކަމާގުޅުންހުރި ފަރާތްތަކުގެ ތަނަވަސް އަދި މުހިންމު ޚިޔާލުތައް ބޭނުންވާ ކަމަށް ވަޒީރު ފާހަގަކުރެއްވިއެވެ.
ވަޒީރުގެ ވާހަކަފުޅުގައި އިތުރަށް ވިދާޅުވީ، މި މަޝްރޫޢުގެ މައިގަނޑު މަޤްޞަދަކީ އެކަކު އަނެކަކަށް އިޙްތިރާމްކުރާ، ޤަދަރުކުރާ އަދި ރީތި އަޚްލާޤީ ސިފަތަކުން ޒީނަތްތެރިވެފައިވާ ޖީލެއް ބިނާކުރުން ކަމަށެވެ. އަދި މި ބައްދަލުވުމުގެ ތެރެއިން ލިބޭ ޚިޔާލުތަކުގެ އެހީގައި، މުޖުތަމަޢަށް ހެޔޮ ބަދަލުތަކެއް އަންނާނެ ފަދަ ނަތީޖާއެއް ހާސިލުކުރެވޭނެ ކަމަށް އުންމީދު ކުރައްވާ ކަމަށްވެސް ވިދާޅުވިއެވެ.
”އަޅުގަނޑު އެދެނީ ތިޔަ އެންމެހާ ބޭފުޅުން ވަރަށް ގުޅިގެން މި މަޝްރޫޢު ކުރިއަށް ގެންދެވުމަށްޓަކާ ތިޔަ ދެއްވާ ޚިޔާލުން އިރާދުކުރެއްވިއްޔާ އަޅުގަނޑުމެންނަށް ކުރިއަށް ދެވިދާނެ. މިފަދަ ރީތި ސިފަތަކުން ޒީނަތްތެރިވެފައިވާ ޖީލެއް ބިނާކުރުމަށްޓަކައި އަޅުގަނޑުމެންނަށް ކުރެވޭނެ މުހިންމު ކަންތައްތަކެއް މީގެ ނަތީޖާއިން ހާސިލް ކުރެވިގެންދާނެ،“ ހީނާ ވަލީދު ވިދާޅުވިއެވެ.
މި ވޯކްޝޮޕްގައި އެކި ދާއިރާތަކުގެ އިސް ބޭފުޅުން ބައިވެރިވެވަޑައިގެން، މަޝްރޫޢު ހިންގާނެ ގޮތްތަކާއި، މުޖުތަމަޢުގައި އިޙްތިރާމް އާލާކުރުމަށް ކުރެވިދާނެ ކަންކަމާ ގުޅޭގޮތުން މަޝްވަރާކޮށްފައިވެއެވެ.
