އިރާޤުގެ އުތުރުގައި ވެއްޓިފައި އޮތް އީރާނުގެ ޑްރޯނެއްގެ ގޮވާތަކެތި ނައްތާލުމުގެ އޮޕަރޭޝަނެއްގެ ތެރޭގައި އެމެރިކާގެ ސިފައިންގެ މީހަކު މަރުވެ، އީރާނު ހަނގުރާމައިގައި މަރުވި އެމެރިކާ ސިފައިންގެ ޖުމްލަ އަދަދު 17 އަށް އަރައިފިއެވެ.
އެމެރިކާގެ ސެންޓްރަލް ކޮމާންޑުން (ސެންޓްކޮމް) ބުނިގޮތުގައި، މި ޙާދިސާ ހިނގާފައިވަނީ އިރާޤުގެ އުތުރުގައި ވައްޓާލާފައިވާ އީރާނުގެ ޖާނުންފިދާވާ ޑްރޯނެއްގެ ގޮވާތަކެތި ”ކޮންޓްރޯލްޑް ޑެޓޮނޭޝަން“ ނުވަތަ ރައްކާތެރިކަމާއެކު ގޮއްވާލުމުގެ ތެރޭގައި ނުބައިކޮށް ގޮވައިގެންނެވެ.
މީގެ އިތުރުން ހުކުރު ދުވަހު އުރުދުންގައި ހުރި އެމެރިކާގެ އަސްކަރީ ބޭހަށް އީރާނުން ދިން ޙަމަލާގައި ހަލާކުވި އިމާރާތްތަކުގެ ކުނިތަކުގެ ދަށުން އިންސާނެއްގެ ހަށިގަނޑުގެ ބައިތަކެއް ފެނިފައިވާ ކަމަށް ސެންޓްކޮމްއިން ވަނީ ބުނެފައެވެ.
ފެބްރުއަރީ މަހުގެ ފަހުކޮޅުން ފެށިގެން އީރާނާއެކު ކުރަމުންދާ ހަނގުރާމައިގައި އެމެރިކާގެ 17 ސިފައިން މަރުވެފައިވާއިރު، 430 އަށްވުރެ ގިނަ ސިފައިން ވަނީ ޒަޚަމްވެފައެވެ.
