ވޯލްޑް ކަޕްގެ މެޗުތަކުގެ މެދުތެރެއިން ފެން ބުއިމަށް ދޭ ”ހައިޑްރޭޝަން ބްރޭކް“ އާ މެދު ސަޕޯޓަރުންގެ ފާޑުކިޔުންތައް އަމާޒުވުމާ ގުޅިގެން، މި މުބާރާތަށްފަހު އެ އުސޫލު ކުރިއަށް ނުގެންގޮސް ހުއްޓާލުމުގެ ފުރުސަތު އެބައޮތް ކަމަށް ފީފާއިން ހާމަކޮށްފިއެވެ.
ފީފާގެ ޗީފް އޮފް ފުޓްބޯލް ޑިވެލޮޕްމަންޓް، އާސެން ވެންގާ މިކަން ހާމަކުރެއްވީ އާދީއްތަ ދުވަހު އާޖެންޓީނާ އާއި ސްޕެއިން ބައްދަލުކުރާ ފައިނަލް މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައެވެ. ނިއު ޔޯކް ނިއު ޖާޒީ ސްޓޭޑިއަމްގައި ބޭއްވި މި ބައްދަލުވުމުގައި ވެންގާ ވިދާޅުވީ، ކޮންމެ ހާފެއްގެ މެދުތެރެއިން މަޖުބޫރުކޮށްފައިވާ ތިން މިނެޓުގެ މި މެދުކެނޑުމުގެ ސަބަބުން ކުޅުންތެރިންގެ ކުޅުމަށް ނުވަތަ މެޗުގެ ފޯރިއަށް އެދެވޭ ބަދަލެއް އަންނަކަން ދައްކައިދޭ އެއްވެސް ހެއްކެއް އަދި ފެންނާން ނެތް ކަމަށެވެ.
”ބައެއް މީހުން މިކަމާ ހިތްހަމަނުޖެހޭ. ވޯލްޑް ކަޕަށްފަހު މީގެ އަސަރުތައް އަޅުގަނޑުމެން ދިރާސާކުރާނަން،“ ކުރިން އާސެނަލްއަށް ކޯޗުކޮށްދިން ވެންގާ ވިދާޅުވިއެވެ.
އޭނާ އިތުރަށް ވިދާޅުވީ ފީފާގެ ބޭނުމަކީ ފުޓްބޯޅަ ބަލާ މީހުންނަށް ފުރިހަމަ ހިދުމަތެއް ދިނުން ކަމަށާއި، މުބާރާތް ނިމުމުން މިކަމުގައި ވަކި ގޮތެއް ނިންމާނެ ކަމަށެވެ.
މި ފަހަރުގެ މުބާރާތުގައި އަލަށް ތައާރަފުކުރި އެހެން ގަވާއިދުތަކަށް ވެންގާ ތައުރީފު ކުރެއްވިއެވެ. އެގޮތުން، ކުޅުންތެރިއަކު ފަރުވާއަށް އެދިއްޖެނަމަ ދަނޑުން ބޭރުގައި އެއް މިނެޓު މަޑުކުރަންޖެހޭ ގަވާއިދުގެ ސަބަބުން، މެޗަކަށްވީ މެޑިކަލް ފަރުވާގެ އަދަދު 2.3 އިން 1.6 އަށް ދަށްވެފައިވާކަން އޭނާ ފާހަގަކުރެއްވިއެވެ.
ނަމަވެސް ހައިޑްރޭޝަން ބްރޭކާ މެދު ގިނަ ބައެއްގެ ޝަކުވާތައް ވަނީ އިތުރުވެފައެވެ. ކުރިން މިފަދަ ބްރޭކްތައް ދެނީ ހަމައެކަނި މޫސުން ވަރަށް ހޫނުނަމަ ރެފްރީގެ އިހުތިޔާރުގައެވެ. އަދި އެއީ 90 ސިކުންތުގެ ވަގުތެކެވެ. އެކަމަކު މި ފަހަރު ކޮންމެ މެޗެއްގައި ތިން މިނެޓުގެ މެދުކެނޑުމެއް މަޖުބޫރުކުރުމުން، މޫސުން ފިނި އަދި އޭސީ ކޮށްފައިވާ ސްޓޭޑިއަމްތަކުގައިވެސް ކުޅުން މެދުކަނޑަން ޖެހެއެވެ. މިސާލަކަށް، ސިއެޓްލްގައި ކުޅުނު މިސްރު-އީރާން މެޗުގައި 16 ޑިގްރީ ސެލްސިއަސްގައިވެސް މި ބްރޭކް ދީފައިވެއެވެ.
ސަޕޯޓަރުން ތުހުމަތުކުރާ ގޮތުގައި ފީފާއިން މި ބްރޭކް ތައާރަފުކުރީ ބްރޯޑްކާސްޓަރުންނަށް އިޝްތިހާރު ދެއްކުމަށް ފުރުސަތު ދިނުމަށެވެ. މީގެ އިތުރުން، މެޗުގެ ފޯރި ކެނޑި، މޮޅަށް ކުޅެމުންދާ ޓީމުގެ ރިދަމް ގެއްލޭ ކަމުގެ ޝަކުވާވެސް ވަނީ ބޮޑުވެފައެވެ. ބައެއް ޓީމުތަކުން މި ބްރޭކަށްފަހު ވަގުތުން ލަނޑު ވަދެފައިވާކަންވެސް ފާހަގަކުރެވެއެވެ.
ވެންގާ ވިދާޅުވީ ސިއްހީ ގޮތުން ބަލާއިރު ބައެއް މެޗުތަކުގައި މިއީ މުހިންމު ކަމެއް ކަމަށް ވިޔަސް، ސަޕޯޓަރުންގެ ޚިޔާލަށް ރިއާޔަތްކޮށް ގޮތްތަކެއް ނިންމާނެ ކަމަށެވެ.
