ރާއްޖޭގެ ބޯޑަރުތައް ހިމާޔަތްކުރުމަށްޓަކައި މަސްތުވާތަކެއްޗާއި މަނާ އެހެނިހެން ތަކެތި އަތުލައިގަތުމުގައި ފާހަގަކޮށްލެވޭ މަސައްކަތްތަކެއް ކުރި ކަސްޓަމްސް އޮފިސަރުންގެ ހިދުމަތުގެ އަގު ވަޒަންކުރުމަށް ހާއްސަ ރަސްމިއްޔާތެއް ބާއްވައިފި އެވެ.
މޯލްޑިވްސް ކަސްޓަމްސް ސަރވިސް އިން ބޭއްވި މި ރަސްމިއްޔާތުގައި، މަސްތުވާތަކެއްޗާއި މަނާ އެހެނިހެން ތަކެތި އަތުލައިގަތުމުގެ އިތުރުން އެހެނިހެން އިދާރީ މައްސަލަތައް ދެނެގަތުމުގައި ފާހަގަކޮށްލެވޭ ހިދުމަތްތަކެއް ކޮށްފައިވާ އޮފިސަރުންނަށް ހަނދާނީ ލިޔުން ވަނީ ހަވާލުކޮށްފައެވެ.
މި ލިޔުންތައް އޮފިސަރުންނާ ހަވާލުކޮށްދެއްވީ ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާ އާއި ޑެޕިއުޓީ ކޮމިޝަނަރ އޮފް ކަސްޓަމްސް އިބްރާހިމް މުފާޒު އަދި ޑެޕިއުޓީ ކޮމިޝަނަރ އޮފް ކަސްޓަމްސް މަހުމޫދު ރިޔާޒެވެ.
މި ރަސްމިއްޔާތުގައި ކޮމިޝަނަރ ޖެނެރަލް ފާތިމަތު ދިޔާނާ ވަނީ އޮފިސަރުން ދެއްކެވި ހިތްވަރާއި ފަންނީ ގާބިލުކަމަށް ތައުރީފު ކުރެއްވައިފައެވެ. އަދި ގައުމީ ސަލާމަތާއި ރައްކާތެރިކަމަށްޓަކައި އޮފިސަރުން ކުރަމުން އަންނަ ބުރަ މަސައްކަތަކީ ގައުމަށް ލިބޭ ބޮޑު ކުރިއެރުމެއް ކަމުގައި އެކަމަނާ ފާހަގަކުރެއްވި އެވެ.
މަސްތުވާތަކެތީގެ ވަބާއިން ގައުމު ސަލާމަތްކުރުމަށާއި، ގާނޫނާ ހިލާފު ވިޔަފާރިތައް ހުއްޓުވުމަށްޓަކައި ކަސްޓަމްސް އޮފިސަރުންގެ ހުޝިއާރުކަމާއި ސާބިތުކަމަކީ ކޮންމެހެން ބޭނުންތެރި ކަމެއްކަމަށް އެކަމަނާ ވިދާޅުވި އެވެ.
މީގެ އިތުރުން ރާއްޖޭގެ ބޯޑަރުތައް ރައްކާތެރިކުރުމުގައި ކަސްޓަމްސްގެ ދައުރު ފުޅާވެފައިވާ ކަމަށާއ މިފަދަ ކާމިޔާބީތަކަކީ އޮފިސަރުންގެ އިހުލާސްތެރިކަމުގެ ނަތީޖާކަމަށްވެސް އެކަމަނާ ފާހަގަކުރެއްވި އެވެ.
