ޗުއްޓީ ދުވަސްވަރާ ދިމާކޮށް ފެތުރެމުންދާ އެކި ބަލިތަކުން ރައްކާތެރިވުމަށް ސަމާލުކަން ދިނުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމުންނަށް އިލްތިމާސްކޮށްފިއެވެ.
ބަލިތަކުން ރައްކާތެރިވުމުގެ ގޮތުން އެޗްޕީއޭ އިން ވަނީ މުހިންމު އިރުޝާދުތަކެއް ނެރެފައެވެ. އެގޮތުން، ހުން އައިސް ގައިގައި ރަތް ބިހި ނެގުން ނުވަތަ ރޯގާގެ އެއްވެސް އަލާމާތެއް ފެންނަނަމަ، މީހުން އެއްވެ އުޅޭ ތަންތަނަށް ނުދިއުމަށް އެ އެޖެންސީން ވަނީ އެދިފައެވެ. ވަކިން ހާއްސަކޮށް، ހިމބިއްސަށް (Measles) ޝައްކުވެގެން ޓެސްޓެއް ހަދައިފިނަމަ، ޓެސްޓުގެ ނަތީޖާ ލިބެންދެން އެކަހެރިވެގެން ހުރުމަކީ ބަލި ފެތުރުން ހުއްޓުވުމަށް އެޅޭނެ މުހިންމު ފިޔަވަޅެކެވެ.
އަމިއްލަ ސާފުތާހިރުކަމަށް ސަމާލުކަން ދިނުމުގެ ގޮތުން، ސައިބޯނި ލައިގެން ގަވާއިދުން އަތްދޮވުމާއި ނުވަތަ ސެނިޓައިޒް ކުރުމަށް އެޗްޕީއޭ އިން އިރުޝާދު ދެއެވެ. އަދި ބަލިތަކުން ރައްކާތެރިވުމަށާއި، ބަލި ޖެހުމުން ބޮޑުވަރުވިޔަ ނުދިނުމަށްޓަކައި ވެކްސިންގެ ޑޯޒްތައް ފުރިހަމަކުރުމުގެ މުހިންމުކަން އެ އެޖެންސީން ފާހަގަކުރެއެވެ.
މީގެ އިތުރުން، މަދިރީގެ ޒަރިއްޔާއިން ފެތުރޭ ބަލިތަކުން ރައްކާތެރިވުމަށްޓަކައި މަދިރި ލޯޝަން ބޭނުންކުރުމާއި، މަދިރި އާލާވާ ފަދަ ތަންތަން ނައްތާލުމަށް ވަނީ އިލްތިމާސްކޮށްފައެވެ. ބަލި މީހާގެ ހާލަތު ގޯސްވާނަމަ ލަސްނުކޮށް ސިއްހީ ފަރުވާ ހޯދުމަށާއި، ފަރުވާ ހޯދުމަށް ސިއްހީ މަރުކަޒުތަކަށް ދާއިރު މާސްކު އެޅުމަށްވެސް އެޗްޕީއޭ އިން ވަނީ އިރުޝާދު ދީފައެވެ.
ޗުއްޓީ ދުވަސްވަރު ބަލިތަކުން ރައްކާތެރިވުމަށް ސަމާލުކަންދެއްވާ! #stayafe #healthyholidays pic.twitter.com/FYYpKCoec5
— Health Protection Agency (@HPA_MV) July 19, 2026
އެޗްޕީއޭ އިން އިތުރަށް ވިދާޅުވީ، ބަލިތަކާ ގުޅޭ މައުލޫމާތު ހޯދުމުގައި ރަސްމީ ވަސީލަތްތަކުން ފޯރުކޮށްދޭ މައުލޫމާތަށް ބަރޯސާވުމަކީ މުހިންމު ކަމެއް ކަމަށެވެ. މި އިލްތިމާސްތަކަށް ހުރިހާ ރައްޔިތުންވެސް ސަމާލުކަން ދިނުމަކީ ޗުއްޓީ ދުވަސްވަރު މުޖުތަމައުގެ ސިއްހީ ރައްކާތެރިކަން ކަށަވަރުކުރުމަށް އެޅޭނެ ބޮޑު ބާރެކެވެ.
