އެމެރިކާއާއި އީރާނާ ދެމެދު ކުރަމުންދާ ހަނގުރާމައިގެ ތެރެއިން، އީރާނުގެ ދެކުނުގައި ހުރި ބޯފެން އުފައްދާ މަރުކަޒަކަށް އެމެރިކާއިން ބޮންއަޅައި އެއްކޮށް ހަލާކުކޮށްލުމާ ގުޅިގެން 10,000 އަށްވުރެ ގިނަ ރައްޔިތުން ބޯފެނުން މަޙްރޫމްވެ، ބޮޑު ކާރިސާއަކާ ކުރިމަތިލާން ޖެހިއްޖެއެވެ.
އީރާނުގެ ’ތަސްނީމް‘ ނިއުސް އެޖެންސީން ރިޕޯޓުކޮށްފައިވާ ގޮތުގައި، އެމެރިކާގެ ވައިގެ ސިފައިން ޙަމަލާދީފައިވަނީ ހުރުމްޒްގާން ޕްރޮވިންސްގެ ޖާސްކް ކައުންޓީގައި އޮންނަ ’ބުންޖީ‘ ކިޔާ އައްސޭރިފަށުގެ އަވަށެއްގައި ހުންނަ ފެން ސާފުކުރާ މަރުކަޒަށެވެ.
ހުރުމްޒްގާން ވޯޓާ އެންޑް ވޭސްޓްވޯޓާ ކޮމްޕެނީގެ ސީ.އީ.އޯ ޙަމްޒާ ޕޫރް ބުނިގޮތުގައި، މި ޙަމަލާގައި ކަނޑުން ފެން ދަމާ ޕަމްޕުތަކާއި އެތަނަށް ކަރަންޓުދޭ ޓްރާންސްފޯމަރު ވަނީ އެއްކޮށް ގޮއްވާލާފައެވެ.
މިއާއެކު އެ ސަރަހައްދުގެ 20 އަވަށަކަށް ބޯފެން ފޯރުކޮށްދިނުން ވަނީ އެއްކޮށް ހުއްޓިފައެވެ. އެ އަވަށްތަކުގައި ދިރިއުޅޭ 10,000 އެއްހާ ރައްޔިތުން މިހާރު ތިބީ ބޯފެނަށް ޖެހި، ވަރަށް ދަތި ޙާލަތެއްގައެވެ. މިއީ ހަނގުރާމައިގެ ތެރެއިން އާންމު ރައްޔިތުންގެ ޒަރޫރީ ވަޞީލަތްތަކަށް އަމާޒުކޮށް ދެމުންދާ ވަރަށް ނުރައްކާތެރި ޙަމަލާތަކެކެވެ. މީގެ ކުރިން އީރާނުން ވެސް ވަނީ ކުވައިތުގައި ހުރި ކަރަންޓާއި ފެން ސާފުކުރާ މަރުކަޒަކަށް ޙަމަލާދީފައެވެ. އދ. ގެ ތަޖުރިބާކާރުން ބުނާގޮތުގައި އާންމުން ބޭނުންކުރާ ފެން ނެޓްވޯކްތަކަށް ޙަމަލާދިނުމަކީ ބައިނަލްއަޤްވާމީ ޤާނޫނުތަކުގެ ދަށުން ހަނގުރާމައިގެ ބޮޑު ކުށެކެވެ.
