ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖޭގެ އުމްރާނީ ތަރައްޤީއަށް ފަށްޓަވާފައިވާ ހަލުވި ދުވެލި ފެނިވަޑައިގެން، ކުރީގެ ރައީސް މުޙައްމަދު ނަޝީދު ކެތްތެރިކަން ކުޑަވެ، ތަރައްޤީގެ މަސައްކަތްތައް ހުއްޓާލުމަށް ގޮވާލެއްވުމުން ސިޔާސީ ދާއިރާގައި ބޮޑެތި ފާޑުކިޔުންތަކެއް އެމަނިކުފާނަށް އަމާޒުވެއްޖެއެވެ.
ސޯޝަލް މީޑިއާ ޕްލެޓްފޯމް ’އެކްސް‘ ގައި ކުރެއްވި ޕޯސްޓެއްގައި ނަޝީދު ވަނީ، ޑޮލަރުގެ އަގު ތިރިނުވަނީސް ސަރުކާރުން ކުރިއަށްގެންދާ އުމްރާނީ ހުރިހާ މަސައްކަތްތަކެއް ހުއްޓާލަން ޖެހޭ ކަމަށް ވިދާޅުވެފައެވެ. ނަޝީދު ވިދާޅުވި ގޮތުގައި، އަސާސީ ޚިދުމަތްތަކަށް ކުރާ ޚަރަދު ފިޔަވައި އިތުރު އެއްވެސް ތަރައްޤީގެ މަޝްރޫޢަކަށް ސަރުކާރުން ޚަރަދުކުރުމަކީ މިވަގުތު ރަނގަޅު ކަމެއް ނޫނެވެ.
ޤައުމުގެ ތަރައްޤީއަށް ހުރަސްއެޅޭ ފަދަ މޭރުމަކުން ވާހަކަދައްކަވަމުން ނަޝީދު އިތުރަށް ލަފާދެއްވީ، ރަށްރަށުގައި މިހާރު ނުނިމި ހުރި މަޝްރޫޢުތައް ރަށު ކައުންސިލްތަކާ ޙަވާލުކުރުމަށެވެ. އަދި ކައުންސިލްތަކުން ’ކްރޮސް ސަބްސިޑީ‘ އުޞޫލުން ފައިސާ ހޯދައިގެން އެ މަސައްކަތްތައް ނިންމިދާނެ ކަމަށް އެމަނިކުފާނު ވިދާޅުވިއެވެ.
Dollar ge agu thiri nuvanees Sarukaarun asaasee khidhumaiy thakah kuraa kharadhu fiyavaa ehves kharadheh kurun rangalheh noon. Umraanee hurihaa masahkatheh huhtaalan jehey. Rahrashugai nunimi huri project thah Rashu Council aa havaal kurun rangalhu vaane. Council in cross subsidy…
— Mohamed Nasheed (@MohamedNasheed) July 18, 2026
ނަޝީދުގެ މި ވާހަކަތަކާ ގުޅިގެން ގިނަ ރައްޔިތުންނާއި ސިޔާސީ ފަރާތްތަކުން ތުހުމަތު ކުރާ ގޮތުގައި، މިއީ ރައީސް ޑރ. މުޢިއްޒުގެ ސަރުކާރުން ރައްޔިތުންނަށް ލިބިދޭ ތަރައްޤީއަށް ހަސަދަވެރިވެ، އެކަން ހުއްޓުވަން ކުރައްވާ މަސައްކަތެކެވެ. ޚާއްޞަކޮށް، ޤައުމު ބިނާކުރުމުގެ ބިޔަ މަޝްރޫޢުތައް ބާރުސްޕީޑުގައި ކުރިއަށް ގެންދަވާތީ، ނަޝީދަށް އެކަން ބަލައިގަންނަން އުނދަގޫވެފައިވާ ކަމަށް ގިނަ ބަޔަކު ބުނެއެވެ.
އިޤްތިޞާދީ ދަތިކަމުގެ އުޒުރު ދައްކަވައި، ރަށްރަށުގެ ބަނދަރާއި، މަގުހެދުމާއި، ބޯހިޔާވަހިކަމުގެ މަޝްރޫޢުތައް ހުއްޓާލަން ނަޝީދު ގޮވާލެއްވުމަކީ، ރާއްޖޭގެ ރަށްތައް ތަރައްޤީވުމަށް އެމަނިކުފާނު ނޭދޭ ކަމުގެ ހެއްކެއްގެ ގޮތުގައި އާންމުން ދަނީ ސިފަކުރަމުންނެވެ.
